ایک حاجی مدینے کے راستے میں

قافلہ لُوٹا گیا صحرا میں اور منزل ہے دُور

اس بیاباں یعنی بحرِ خشک کا ساحل ہے دُورarooz could not scan this line

ہم سفر میرے شکارِ دشنۂ رہزن ہوئے

بچ گئے جو، ہو کے بے دل سُوئے بیت اللہ پھرے

اُس بخاری نوجواں نے کس خوشی سے جان دی!arooz could not scan this line

موت کے زہراب میں پائی ہے اُس نے زندگی

خنجرِ رہزن اُسے گویا ہلالِ عید تھا

’ہائے یثرِب‘ دل میں، لب پر نعرۂ توحید تھا

خوف کہتا ہے کہ یثرِب کی طرف تنہا نہ چل

شوق کہتا ہے کہ تُو مسلم ہے، بے باکانہ چلarooz could not scan this line

بے زیارت سُوئے بیت اللہ پھر جاؤں گا کیا

عاشقوں کو روزِ محشر منہ نہ دِکھلاؤں گا کیا

خوفِ جاں رکھتا نہیں کچھ دشت پیمائے حجاز

ہجرتِ مدفونِ یثرِبؐ میں یہی مخفی ہے رازarooz could not scan this line

گو سلامت محملِ شامی کی ہمراہی میں ہے

عشق کی لذّت مگر خطروں کی جاں کاہی میں ہے

آہ! یہ عقلِ زیاں اندیش کیا چالاک ہے

اور تاثّر آدمی کا کس قدر بے باک ہے