وطنیت

اس دور میں مے اور ہے، جام اور ہے جم اور

ساقی نے بِنا کی روِشِ لُطف و ستم اور

مسلم نے بھی تعمیر کِیا اپنا حرم اور

تہذیب کے آزر نے ترشوائے صنم اور

ان تازہ خداؤں میں بڑا سب سے وطن ہے

جو پیرہن اس کا ہے، وہ مذہب کا کفن ہے

یہ بُت کہ تراشیدۂ تہذیبِ نوی ہے

غارت گرِ کاشانۂ دینِ نبَوی ہےarooz could not scan this line

بازو ترا توحید کی قوّت سے قوی ہے

اسلام ترا دیس ہے، تُو مصطفوی ہےarooz could not scan this line

نظّارۂ دیرینہ زمانے کو دِکھا دے

اے مصطفَوی خاک میں اس بُت کو ملا دے!arooz could not scan this line

ہو قیدِ مقامی تو نتیجہ ہے تباہی

رہ بحر میں آزادِ وطن صُورتِ ماہی

ہے ترکِ وطن سُنّتِ محبوبؐ الٰہیarooz could not scan this line

دے تُو بھی نبوّت کی صداقت پہ گواہی

گُفتارِ سیاست میں وطن اور ہی کچھ ہے

ارشادِ نبوّت میں وطن اور ہی کچھ ہے

اقوامِ جہاں میں ہے رقابت تو اسی سے

تسخیر ہے مقصودِ تجارت تو اسی سے

خالی ہے صداقت سے سیاست تو اسی سے

کمزور کا گھر ہوتا ہے غارت تو اسی سے

اقوام میں مخلوقِ خدا بٹتی ہے اس سے

قومیّتِ اسلام کی جڑ کٹتی ہے اس سے