پانی ترے چشموں کا تڑپتا ہوا سیماب

پانی ترے چشموں کا تڑپتا ہوا سیماب

مُرغانِ سحَر تیری فضاؤں میں ہیں بیتاب

گر صاحبِ ہنگامہ نہ ہو منبر و محراب

دیں بندۂ مومن کے لیے موت ہے یا خواب

ہیں ساز پہ موقُوف نوا ہائے جگر سوز

ڈھِیلے ہوں اگر تار تو بے کار ہے مِضراب

مُلّا کی نظر نُورِ فراست سے ہے خالی

بے سوز ہے میخانۂ صُوفی کی مئے ناب

بیدار ہوں دل جس کی فغانِ سَحری سے

اس قوم میں مُدّت سے وہ درویش ہے نایاب