نویدِ امن ہے بیدادِ دوست جاں کے لئے

نویدِ امن ہے بیدادِ دوست جاں کے لئے

رہی نہ طرزِ ستم کوئی آسماں کے لئے

بلا سے!گر مژۂ یار تشنۂ خوں ہےarooz could not scan this line

رکھوں کچھ اپنی ہی مژگان ِخوں فشاں کے لئے

وہ زندہ ہم ہیں کہ ہیں روشناسِ خلق اے خضر

نہ تم کہ چور بنے عمرِ جاوداں کے لئے

رہا بلا میں بھی، میں مبتلائے آفتِ رشک

بلائے جاں ہے ادا تیری اک جہاں کے لئے

فلک نہ دور رکھ اُس سے مجھے، کہ میں ہی نہیں

دراز دستئِ قاتل کے امتحاں کے لئے

مثال یہ مری کوشش کی ہے کہ مرغِ اسیر

کرے قفس میں فراہم خس آشیاں کے لئے

گدا سمجھ کے وہ چپ تھا، مری جو شامت آئے

اٹھا اور اٹھ کے قدم میں نے پاسباں کے لئے

بہ قدرِ شوق نہیں ظرفِ تنگنائے غزلarooz could not scan this line

کچھ اور چاہیے وسعت مرے بیاں کے لئے

دیا ہے خلق کو بھی، تا اسے نظر نہ لگے

بنا ہے عیش تجمُّل حسین خاں کے لئے

زباں پہ بارِ خدایا! یہ کس کا نام آیا

کہ میرے نطق نے بوسے مر ی زباں کے لئےarooz could not scan this line

نصیرِ دولت و دیں اور معینِ ملّت و ملک

بنا ہے چرخِ بریں جس کے آستاں کے لئے

زمانہ عہد میں اُس کے ہے محوِ آرائش

بنیں گے اور ستارے اب آسماں کے لئے

ورق تمام ہوا اور مدح باقی ہے

سفینہ چاہیے اس بحرِ بیکراں کے لئےarooz could not scan this line

ادائے خاص سے غالب ہوا ہے نکتہ سرا

صلائے عام ہے یارانِ نکتہ داں کے لئے