جنھیں مَیں ڈھُونڈتا تھا آسمانوں میں زمینوں میں

جنھیں مَیں ڈھُونڈتا تھا آسمانوں میں زمینوں میں

وہ نکلے میرے ظلمت خانۂ دل کے مکینوں میں

حقیقت اپنی آنکھوں پر نمایاں جب ہوئی اپنی

مکاں نکلا ہمارے خانۂ دل کے مکینوں میں

اگر کچھ آشنا ہوتا مذاقِ جبَہہ سائی سے

تو سنگِ آستانِ کعبہ جا مِلتا جبینوں میں

کبھی اپنا بھی نظّارہ کِیا ہے تو نے اے مجنوں

کہ لیلیٰ کی طرح تو خود بھی ہے محمل نشینوں میں

مہینے وصل کے گھڑیوں کی صورت اُڑتے جاتے ہیں

مگر گھڑیاں جُدائی کی گزرتی ہیں مہینوں میں

مجھے روکے گا تُو اے ناخدا کیا غرق ہونے سے

کہ جن کو ڈوبنا ہو، ڈوب جاتے ہیں سفینوں میں

چھُپایا حُسن کو اپنے کلیم اللہ سے جس نے

وہی ناز آفریں ہے جلوہ پیرا نازنینوں میںarooz could not scan this line

جلا سکتی ہے شمعِ کشتہ کو موجِ نفَس ان کی

الٰہی! کیا چھُپا ہوتا ہے اہل دل کے سینوں میںarooz could not scan this line

تمنّا دردِ دل کی ہو تو کر خدمت فقیروں کی

نہیں ملتا یہ گوہر بادشاہوں کے خزینوں میں

نہ پُوچھ ان خرقہ پوشوں کی، ارادت ہو تو دیکھ ان کو

یدِ بیضا لیے بیٹھے ہیں اپنی آستینوں میںarooz could not scan this line

ترستی ہے نگاہِ نارسا جس کے نظارے کوarooz could not scan this line

وہ رونق انجمن کی ہے انھی خلوت گزینوں میں

کسی ایسے شرر سے پھُونک اپنے خرمنِ دل کو

کہ خورشیدِ قیامت بھی ہو تیرے خوشہ چینوں میں

محبّت کے لیے دل ڈھُونڈ کوئی ٹُوٹنے والا

یہ وہ مے ہے جسے رکھتے ہیں نازک آبگینوں میں

سراپا حُسن بن جاتا ہے جس کے حُسن کا عاشق

بھلا اے دل حسیں ایسا بھی ہے کوئی حسیِنوں میں

پھڑک اُٹھّا کوئی تیری ادائے ’مَا عَرَفْنا‘ پرarooz could not scan this line

ترا رُتبہ رہا بڑھ چڑھ کے سب ناز آفرینوں میں

نمایاں ہو کے دِکھلا دے کبھی ان کو جمال اپنا

بہت مدّت سے چرچے ہیں ترے باریک بینوں میں

خموش اے دل!، بھری محفل میں چِلّانا نہیں اچھّا

ادب پہلا قرینہ ہے محبّت کے قرینوں میں

بُرا سمجھوں انھیں، مجھ سے تو ایسا ہو نہیں سکتا

کہ میں خود بھی تو ہوں اقبالؔ اپنے نُکتہ چینوں میں