داغ

عظمتِ غالبؔ ہے اک مدّت سے پیوندِ زمیںarooz could not scan this line

مہدیِ مجروحؔ ہے شہرِ خموشاں کا مکیں

توڑ ڈالی موت نے غربت میں مینائے امیرؔ

چشمِ محفل میں ہے اب تک کیفِ صہبائے امیرؔ

آج لیکن ہمنوا! سارا چمن ماتم میں ہےarooz could not scan this line

شمعِ روشن بُجھ گئی، بزمِ سخن ماتم میں ہے

بُلبلِ دلّی نے باندھا اس چمن میں آشیاں

ہم نوا ہیں سب عنادل باغِ ہستی کے جہاں

چل بسا داغؔ آہ! میّت اس کی زیبِ دوش ہے

آخری شاعر جہان آباد کا خاموش ہے

اب کہاں وہ بانکپن، وہ شوخیِ طرزِ بیاں

آگ تھی کافورِ پیری میں جوانی کی نہاں

تھی زبانِ داغؔ پر جو آرزو ہر دل میں ہے

لیلیِ معنی وہاں بے پردہ، یاں محمل میں ہے

اب صبا سے کون پُوچھے گا سکُوتِ گُل کا راز

کون سمجھے گا چمن میں نالۂ بُلبل کا راز

تھی حقیقت سے نہ غفلت فکر کی پرواز میں

آنکھ طائر کی نشیمن پر رہی پرواز میں

اور دِکھلائیں گے مضموں کی ہمیں باریکیاں

اپنے فکرِ نکتہ آرا کی فلک پیمائیاں

تلخیِ دوراں کے نقشے کھینچ کر رُلوائیں گےarooz could not scan this line

یا تخیّل کی نئی دنیا ہمیں دِکھلائیں گے

اس چمن میں ہوں گے پیدا بُلبلِ شیراز بھی

سینکڑوں ساحر بھی ہوں گے، صاحبِ اعجاز بھی

اُٹھّیں گے آزر ہزاروں شعر کے بُت خانے سےarooz could not scan this line

مے پِلائیں گے نئے ساقی نئے پیمانے سے

لِکھّی جائیں گی کتابِ دل کی تفسیریں بہت

ہوں گی اے خوابِ جوانی! تیری تعبیریں بہت

ہوبہو کھینچے گا لیکن عشق کی تصویر کون؟arooz could not scan this line

اُٹھ گیا ناوک فگن، مارے گا دل پر تِیر کون؟

اشک کے دانے زمینِ شعر میں بوتا ہوں میں

تُو بھی رو اے خاکِ دلّی! داغؔ کو روتا ہوں میں

اے جہان آباد، اے سرمایۂ بزمِ سخن!

ہوگیا پھر آج پامالِ خزاں تیرا چمنarooz could not scan this line

وہ گُلِ رنگیں ترا رخصت مثالِ بُو ہوا

آہ! خالی داغؔ سے کاشانۂ اُردو ہوا

تھی نہ شاید کچھ کشش ایسی وطن کی خاک میں

وہ مہِ کامل ہوا پنہاں دکن کی خاک میںarooz could not scan this line

اُٹھ گئے ساقی جو تھے، میخانہ خالی رہ گیا

یادگارِ بزمِ دہلی ایک حالیؔ رہ گیا

آرزو کو خون رُلواتی ہے بیدادِ اجلarooz could not scan this line

مارتا ہے تِیر تاریکی میں صیّادِ اجل

کھُل نہیں سکتی شکایت کے لیے لیکن زباں

ہے خزاں کا رنگ بھی وجہِ قیامِ گُلِستاں

ایک ہی قانونِ عالم گیر کے ہیں سب اثر

بُوئے گُل کا باغ سے، گُلچیں کا دنیا سے سفرarooz could not scan this line