آفتاب

اے آفتاب! رُوح و روانِ جہاں ہے تُو

شیرازہ بندِ دفترِ کون و مکاں ہے تُو

باعث ہے تُو وجود و عدم کی نمود کا

ہے سبز تیرے دم سے چمن ہست و بود کاarooz could not scan this line

قائم یہ عُنصروں کا تماشا تجھی سے ہے

ہر شے میں زندگی کا تقاضا تجھی سے ہے

ہر شے کو تیری جلوہ گری سے ثبات ہے

تیرا یہ سوز و ساز سراپا حیات ہے

وہ آفتاب جس سے زمانے میں نور ہے

دل ہے، خرد ہے، روحِ رواں ہے، شعور ہے

اے آفتاب! ہم کو ضیائے شعور دے

چشمِ خرد کو اپنی تجلّی سے نور دے

ہے محفلِ وجود کا ساماں طراز تُو

یزدانِ ساکنانِ نشیب و فراز تُو

تیرا کمال ہستیِ ہر جاندار میںarooz could not scan this line

تیری نمود سلسلۂ کوہسار میں

ہر چیز کی حیات کا پروردگار تُو

زائیدگانِ نُور کا ہے تاجدار تُوarooz could not scan this line

نے ابتدا کوئی نہ کوئی انتہا تری

آزادِ قیدِ اوّل و آخر ضیا تری