عقل و دل

عقل نے ایک دن یہ دل سے کہا

بھُولے بھٹکے کی رہنما ہُوں میں

ہوں زمیں پر، گزر فلک پہ مرا

دیکھ تو کس قدر رسا ہوں میں

کام دنیا میں رہبری ہے مرا

مثل خضرِ خجستہ پا ہوں میںarooz could not scan this line

ہوں مفسِّر کتابِ ہستی کی

مظہرِ شانِ کبریا ہوں میں

بوند اک خون کی ہے تُو لیکن

غیرتِ لعلِ بے بہا ہوں میں

دل نے سُن کر کہا یہ سب سچ ہے

پر مجھے بھی تو دیکھ، کیا ہوں میں

رازِ ہستی کو تُو سمجھتی ہے

اور آنکھوں سے دیکھتا ہوں میں!

ہے تجھے واسطہ مظاہر سے

اور باطن سے آشنا ہوں میں

عِلم تجھ سے تو معرفت مجھ سے

تُو خدا جُو، خدا نما ہوں میں

علم کی انتہا ہے بے تابی

اس مرض کی مگر دوا ہوں میں

شمع تُو محفلِ صداقت کی

حُسن کی بزم کا دِیا ہوں میں

تُو زمان و مکاں سے رشتہ بپا

طائرِ سِدرہ آشنا ہوں میںarooz could not scan this line

کس بلندی پہ ہے مقام مرا

عرش ربِّ جلیل کا ہوں میں!arooz could not scan this line