شعاع آفتاب

صبح جب میری نگہ سودائیِ نظّارہ تھی

آسماں پر اک شُعاعِ آفتاب آوارہ تھی

مَیں نے پُوچھا اُس کرن سے “اے سراپا اضطراب!arooz could not scan this line

تیری جانِ ناشکیبا میں ہے کیسا اضطراب

تُو کوئی چھوٹی سی بجلی ہے کہ جس کو آسماں

کر رہا ہے خرمنِ اقوام کی خاطر جواں

یہ تڑپ ہے یا ازل سے تیری خُو ہے، کیا ہے یہ

رقص ہے، آوارگی ہے، جُستجو ہے، کیا ہے یہ؟”

“خُفتہ ہنگامے ہیں میری ہستیِ خاموش میںarooz could not scan this line

پرورش پائی ہے مَیں نے صُبح کی آغوش میں

مُضطرب ہر دَم مری تقدیر رکھتی ہے مجھے

جُستجو میں لذّتِ تنویر رکھتی ہے مجھے

برقِ آتش خُو نہیں، فطرت میں گو ناری ہوں مَیں

مہرِ عالم تاب کا پیغامِ بیداری ہوں مَیں

سُرمہ بن کر چشمِ انساں میں سما جاؤں گی مَیں

رات نے جو کچھ چھُپا رکھّا تھا، دِکھلاؤں گی مَیں

تیرے مستوں میں کوئی جویائے ہشیاری بھی ہے

سونے والوں میں کسی کو ذوقِ بیداری بھی ہے؟”