رات اور شاعر

کیوں میری چاندنی میں پھرتا ہے تُو پریشاں

خاموش صورتِ گُل، مانندِ بُو پریشاں

تاروں کے موتیوں کا شاید ہے جوہری تُو

مچھلی ہے کوئی میرے دریائے نور کی تُو

یا تُو مری جبیں کا تارا گرا ہُوا ہے

رفعت کو چھوڑ کر جو بستی میں جا بسا ہے

خاموش ہو گیا ہے تارِ ربابِ ہستی

ہے میرے آئنے میں تصویرِ خوابِ ہستی

دریا کی تہ میں چشمِ گرادب سو گئی ہےarooz could not scan this line

ساحل سے لگ کے موجِ بے تاب سو گئی ہے

بستی زمیں کی کیسی ہنگامہ آفریں ہے

یوں سو گئی ہے جیسے آباد ہی نہیں ہے

شاعر کا دل ہے لیکن ناآشنا سکُوں سے

آزاد رہ گیا تُو کیونکر مرے فسوں سے؟

مَیں ترے چاند کی کھیتی میں گُہر بوتا ہوں

چھُپ کے انسانوں سے مانندِ سحَر روتا ہوں

دن کی شورش میں نکلتے ہوئے گھبراتے ہیں

عُزلتِ شب میں مرے اشک ٹپک جاتے ہیںarooz could not scan this line

مجھ میں فریاد جو پنہاں ہے، سُناؤں کس کو

تپشِ شوق کا نظّارہ دِکھاؤں کس کو

برقِ ایمن مرے سینے پہ پڑی روتی ہے

دیکھنے والی ہے جو آنکھ، کہاں سوتی ہے!arooz could not scan this line

صفَتِ شمعِ لحد مُردہ ہے محفل میریarooz could not scan this line

آہ، اے رات! بڑی دُور ہے منزل میری

عہدِ حاضر کی ہوا راس نہیں ہے اس کو

اپنے نقصان کا احساس نہیں ہے اس کو

ضبطِ پیغامِ محبّت سے جو گھبراتا ہوں

تیرے تابندہ ستاروں کو سُنا جاتا ہوں