لینن

اے انفُس و آفاق میں پیدا ترے آیات

حق یہ ہے کہ ہے زندہ و پائندہ تِری ذات

میں کیسے سمجھتا کہ تو ہے یا کہ نہیں ہے

ہر دم متغّیر تھے خرد کے نظریات

محرم نہیں فطرت کے سرودِ اَزلی سے

بِینائے کواکب ہو کہ دانائے نباتات

آج آنکھ نے دیکھا تو وہ عالم ہُوا ثابت

میں جس کو سمجھتا تھا کلیسا کے خرافات

ہم بندِ شب و روز میں جکڑے ہُوئے بندے

تُو خالقِ اعصار و نگارندۂ آنات!

اک بات اگر مجھ کو اجازت ہو تو پُوچھوں

حل کر نہ سکے جس کو حکیموں کے مقالات

جب تک میں جِیا خیمۂ افلاک کے نیچے

کانٹے کی طرح دل میں کھٹکتی رہی یہ بات

گفتار کے اسلوب پہ قابُو نہیں رہتا

جب رُوح کے اندر متلاطم ہوں خیالات

وہ کون سا آدم ہے کہ تُو جس کا ہے معبود

وہ آدمِ خاکی کہ جو ہے زیرِ سماوات؟arooz could not scan this line

مشرق کے خداوند سفیدانِ فرنگی

مغرب کے خداوند درخشندہ فِلِزّات

یورپ میں بہت روشنیِ علم و ہُنر ہے

حق یہ ہے کہ بے چشمۂ حیواں ہے یہ ظُلمات

رعنائیِ تعمیر میں، رونق میں، صفا میں

گِرجوں سے کہیں بڑھ کے ہیں بنکوں کی عماراتarooz could not scan this line

ظاہر میں تجارت ہے، حقیقت میں جُوا ہے

سُود ایک کا لاکھوں کے لیے مرگِ مفاجات

یہ عِلم، یہ حِکمت، یہ تدبُّر، یہ حکومت

پیتے ہیں لہُو، دیتے ہیں تعلیمِ مساوات

بے کاری و عُریانی و مے خواری و اِفلاسarooz could not scan this line

کیا کم ہیں فرنگی مَدنِیّت کے فتوحات

وہ قوم کہ فیضانِ سماوی سے ہو محروم

حد اُس کے کمالات کی ہے برق و بخارات

ہے دل کے لیے موت مشینوں کی حکومت

احساسِ مروّت کو کُچل دیتے ہیں آلاتarooz could not scan this line

آثار تو کچھ کچھ نظر آتے ہیں کہ آخر

تدبیر کو تقدیر کے شاطر نے کیا مات

میخانے کی بُنیاد میں آیا ہے تزَلزُل

بیٹھے ہیں اسی فکر میں پِیرانِ خرابات

چہروں پہ جو سُرخی نظر آتی ہے سرِ شام

یا غازہ ہے یا ساغر و مِینا کی کرامات

تو قادر و عادل ہے مگر تیرے جہاں میں

ہیں تلخ بہت بندۂ مزدور کے اوقات

کب ڈُوبے گا سرمایہ پرستی کا سفینہ؟

دُنیا ہے تری منتظرِ روزِ مکافات!