تصویر و مصور

کہا تصویر نے تصویر گر سے

نمائش ہے مری تیرے ہُنر سے

ولیکن کس قدر نا مُنصفی ہے

کہ تُو پوشیدہ ہو میری نظر سے!

گراں ہے چشمِ بینا دیدہ وَر پر

جہاں بینی سے کیا گُزری شرَر پر!

نظر، درد و غم و سوز و تب و تاب

تُو اے ناداں، قناعت کر خبر پر

خبر، عقل و خِرد کی ناتوانی

نظر، دل کی حیاتِ جاودانی

نہیں ہے اس زمانے کی تگ و تاز

سزاوارِ حدیثِ ’لن ترانی‘

تو ہے میرے کمالاتِ ہُنر سے

نہ ہو نومید اپنے نقش گر سے

مرے دیدار کی ہے اک یہی شرط

کہ تُو پِنہاں نہ ہو اپنی نظر سے