وہ حرفِ راز کہ مجھ کو سِکھا گیا ہے جُنوں

وہ حرفِ راز کہ مجھ کو سِکھا گیا ہے جُنوں

خدا مجھے نفَسِ جبرئیل دے تو کہوں

ستارہ کیا مری تقدیر کی خبر دے گا

وہ خود فراخیِ افلاک میں ہے خوار و زبُوں

حیات کیا ہے، خیال و نظر کی مجذوبی

خودی کی موت ہے اندیشہ ہائے گوناگُوں

عجب مزا ہے، مجھے لذّتِ خودی دے کر

وہ چاہتے ہیں کہ مَیں اپنے آپ میں نہ رہوں

ضمیرِ پاک و نگاہِ بلند و مستیِ شوق

نہ مال و دولتِ قاروں، نہ فکرِ افلاطوں

سبق مِلا ہے یہ معراجِ مصطفیٰؐ سے مجھےarooz could not scan this line

کہ عالمِ بشَرِیّت کی زد میں ہے گردُوںarooz could not scan this line

یہ کائنات ابھی ناتمام ہے شاید

کہ آرہی ہے دما دم صدائے ’کُنْ فَیَکُوںْ‘arooz could not scan this line

علاج آتشِ رومیؔ کے سوز میں ہے ترا

تری خرد پہ ہے غالب فرنگیوں کا فسوں

اُسی کے فیض سے میری نگاہ ہے روشن

اُسی کے فیض سے میرے سبُو میں ہے جیحوں