دعا (مسجد قرطبہ میں لکھی گئی)

ہے یہی میری نماز، ہے یہی میرا وضو

میری نواؤں میں ہے میرے جگر کا لہُو

صُحبتِ اہلِ صفا، نُور و حضور و سُرور

سر خوش و پُرسوز ہے لالہ لبِ آبُجو

راہِ محبّت میں ہے کون کسی کا رفیق

ساتھ مرے رہ گئی ایک مری آرزو

میرا نشیمن نہیں درگہِ میر و وزیر

میرا نشیمن بھی تُو، شاخِ نشیمن بھی تُو

تجھ سے گریباں مرا مطلعِ صُبحِ نشور

تجھ سے مرے سینے میں آتشِ ’اَﷲ ھو‘arooz could not scan this line

تجھ سے مری زندگی سوز و تب و درد و داغ

تُو ہی مری آرزو، تُو ہی مری جُستجو

پاس اگر تُو نہیں، شہر ہے ویراں تمام

تُو ہے تو آباد ہیں اُجڑے ہُوئے کاخ و کُو

پھر وہ شرابِ کُہن مجھ کو عطا کر کہ مَیں

ڈھُونڈ رہا ہوں اُسے توڑ کے جام و سُبو

چشمِ کرم ساقیا! دیر سے ہیں منتظر

جلوَتیوں کے سُبو، خلوَتیوں کے کُدوarooz could not scan this line

تیری خدائی سے ہے میرے جُنوں کو گِلہ

اپنے لیے لامکاں، میرے لیے چار سُو!

فلسفہ و شعر کی اور حقیقت ہے کیا

حرفِ تمنّا، جسے کہہ نہ سکیں رُو بُرو