گلوں کا دور ہے بلبل مزے بہار میں لوٹ

گلوں کا دور ہے بلبل مزے بہار میں لوٹ

خزاں مچائے گی آتے ہی اس دیار میں لوٹ

کشود کار کی کوشش میں دے نہ حرص کو دخل

شکست دیتی ہے فوجوں کو کارزار میں لوٹ

لبھائے سیکڑوں دل ان کے خال عارض نے

مچائے زنگیوں نے وادیٔ تتار میں لوٹ

وہ منتظم ہے رہے جس کی جز و کل پہ نظر

نہ کر سکے کوئی گونگیر کاروبار میں لوٹ

جہاں میں ہوتی ہے احسان کی جزا احسان

ثواب نیکیوں کے دور اختیار میں لوٹ

عبث ہے بوند کا چوکا اگر گھڑے ڈھلکائے

ہمیشہ نقد میں وارا ہے یاں ادھار میں لوٹ

کئے ہیں شیب نے سب جسم کے قویٰ کمزور

شروع ہو گئی ہر سمت اس حصار میں لوٹ

ہجوم یاس میں چھوڑ اے امید کشور دل

ہے قتل عام کا غل شہر میں جوار میں لوٹ

بنے وہ فاتح کونین خوش ہو تو جس سے

زیادہ گنج کواکب سے ہو شمار میں لوٹ

دیار دل میں ہے پھر داغ عشق کا توڑا

جنوں متاع ہوس موسم بہار میں لوٹ

بھری ہے تازہ ہر ایک سر میں شور و شر کی ہوا

عجب نہیں جو مچے باغ روزگار میں لوٹ

حبیبؔ مشق ریاضت سے کھو کے زنگ دوئی

مزے وصال کے ہر دم فراق یار میں لوٹ

gulon ka daur hai bulbul maze bahar mein laut

khizan machaegi ate hi is dayar mein laut

kashud-e-kar ki koshish mein de na hirs ko dakhl

shikast deti hai faujon ko karzar mein laut

lubhae saikron dil un ke khal ariz ne

machae zangiyon ne wadi-e-tatar mein laut

wo muntazim hai rahe jis ki juz-o-kal pe nazar

na kar sake koi gongir karobar mein laut

jahan mein hoti hai ehsan ki jaza ehsan

sawab nekiyon ke daur ikhtiyar mein laut

abas hai bund ka choka agar ghare dhalkae

hamesha naqd mein wara hai yan udhar mein laut

kiye hain sheb ne sab jism ke qawi kamzor

shuru ho gai har samt is hisar mein laut

hujum-e-yas mein chhor ai umid kishwar-e-dil

hai qatl-e-am ka ghul shahr mein jawar mein laut

bane wo fateh kaunain khush ho to jis se

ziyada ganj-e-kawakib se ho shumar mein laut

dayar-e-dil mein hai phir dagh-e-ishq ka tora

junun mata-e-hawas mausam-e-bahar mein laut

bhari hai taza har ek sar mein shor-o-shar ki hawa

ajab nahin jo mache bagh-e-rozgar mein laut

habib mashq riyazat se kho ke zang dui

maze wisal ke har dam firaq-e-yar mein laut