گلے لگائیں بلائیں لیں تم کو پیار کریں

گلے لگائیں بلائیں لیں تم کو پیار کریں

جو بات مانو تو منت ہزار بار کریں

یہ ہاتھ کیسے ہیں بیکار کچھ تو کار کریں

بہار آئی گریبان تار تار کریں

کہاں سے لائیں اب اس کو جو ہمکنار کریں

تسلی کیا تری او جان بے قرار کریں

وہ ربط تم سے بڑھائیں وہ تم کو یار کریں

ہزار طرح کے جو جبر اختیار کریں

گرائے سیل عناصر کی چار دیواری

خراب خانۂ تن چشم اشکبار کریں

تمہارے در سے نہ مایوس جائیں حاجت مند

قبول ہووے جو توبہ گناہ گار کریں

کفن بھی ہو گیا میلا دھرے دھرے اے موت

تمام عمر ہوئی کب تک انتظار کریں

برنگ غنچہ زباں ہے دہاں میں زیر زباں

تمہارے قول کا کیا خاک اعتبار کریں

گدا ترے در دولت کے ہیں یہ مستغنی

جو سلطنت بھی ملے تو نہ اختیار کریں

غرور حسن سے ہرگز سنے گا ایک نہ گل

چمن میں نالے اگر بلبلیں ہزار کریں

سنائے رکھتا ہوں سب کو مری وصیت ہے

کہ تا اسی پہ عمل میرے غم گسار کریں

چراغ زیست جب اس ننگ دودماں کا ہو گل

عزیز شمع نہ روشن سر مزار کریں

ترے سوا ہے کریم اور رحیم کس کی ذات

نجات کس سے طلب ہم گناہ گار کریں

بجائے سرمہ لگائیں غبار کوچۂ یار

یہی علاج ترا چشم اشکبار کریں

ستم شعار جفا پیشہ بے مروت ہے

سراہیے جگر ان کے جو تجھ کو پیار کریں

بڑھا کے لکھیں نہ شاعر حدیث زلف رسا

ہوا ہے طول مناسب ہے اختصار کریں

در کریم سے آتی ہے متصل یہ صدا

وہ کیوں نہ پائے جسے ہم امیدوار کریں

یہ بت اٹھائیں جو قرآں بھی کعبے میں اے رندؔ

خدا سے ہم تو ہوں منکر جو اعتبار کریں

gale lagaen balaen len tum ko pyar karen

jo bat mano to minnat hazar bar karen

ye hath kaise hain bekar kuchh to kar karen

bahar ai gareban-e-tar tar karen

kahan se laen ab us ko jo hamkanar karen

tasalli kya tiri o jan-e-be qarar karen

wo rabt tum se barhaen wo tum ko yar karen

hazar tarah ke jo jabr ikhtiyar karen

girae sail-e-anasir ki char diwari

kharab khana-e-tan chashm-e-ashkbar karen

tumhare dar se na mayus jaen hajat mand

qubul howe jo tauba gunah gar karen

kafan bhi ho gaya maila dhare dhare ai maut

tamam umr hui kab tak intizar karen

barang-e-ghuncha zaban hai dahan mein zer-e-zaban

tumhare qaul ka kya khak etibar karen

gada tire dar-e-daulat ke hain ye mustaghni

jo saltanat bhi mile to na ikhtiyar karen

ghurur-e-husn se hargiz sunega ek na gul

chaman mein nale agar bulbulen hazar karen

sunae rakhta hun sab ko miri wasyyat hai

ke ta usi pe amal mere gham gusar karen

charagh-e-zist jab is nang dudman ka ho gul

aziz shama na raushan sar-e-mazar karen

tire siwa hai karim aur rahim kis ki zat

najat kis se talab ham gunah gar karen

bajae surma lagaen ghubar-e-kucha-e-yar

yahi ilaj tira chashm-e-ashkbar karen

sitam shiar jafa pesha be murawwat hai

sarahye jigar un ke jo tujh ko pyar karen

barha ke likhen na shayar hadis-e-zulf-e-rasa

hua hai tul-e-munasib hai ikhtisar karen

dar-e-karim se ati hai muttasil ye sada

wo kyun na pae jise ham umidwar karen

ye but uthaen jo quran bhi kaabe mein ai rind

khuda se ham to hun munkir jo etibar karen