گلا نہیں ہے ہمیں اپنی جاں گدازی کا

گلا نہیں ہے ہمیں اپنی جاں گدازی کا

جگر پہ زخم ہے اس کی زباں درازی کا

سمند ناز نے اس کے جہاں کیا پامال

وہی ہے اب بھی اسے شوق ترک تازی کا

ستم ہیں قہر ہیں لونڈے شراب خانے کے

اتار لیتے ہیں عمامہ ہر نمازی کا

الٹ پلٹ مری آہ سحر کی کیا ہے کم

اگر خیال تمہیں ہووے نیزہ بازی کا

بتاؤ ہم سے کوئی آن تم سے کیا بگڑی

نہیں ہے تم کو سلیقہ زمانہ سازی کا

خدا کو کام تو سونپے ہیں میں نے سب لیکن

رہے ہے خوف مجھے واں کی بے نیازی کا

چلو ہو راہ موافق کہے مخالف کے

طریق چھوڑ دیا تم نے دل نوازی کا

کسو کی بات نے آگے مرے نہ پایا رنگ

دلوں میں نقش ہے میری سخن طرازی کا

بسان خاک ہو پامال راہ خلق اے میرؔ

رکھے ہے دل میں اگر قصد سرفرازی کا

gila nahin hai hamen apni jan gudazi ka

jigar pe zakhm hai us ki zaban darazi ka

samand-e-naz ne us ke jahan kiya pamal

wahi hai ab bhi use shauq tark-e-tazi ka

sitam hain qahr hain launde sharab khane ke

utar lete hain ammama har namazi ka

ulat palat miri ah-e-sahar ki kya hai kam

agar khayal tumhen howe neza bazi ka

batao ham se koi an tum se kya bigri

nahin hai tum ko saliqa zamana sazi ka

khuda ko kam to saunpe hain main ne sab lekin

rahe hai khauf mujhe wan ki be niyazi ka

chalo ho rah muafiq kahe mukhalif ke

tariq chhor diya tum ne dil nawazi ka

kisu ki bat ne age mire na paya rang

dilon mein naqsh hai meri sukhan tarazi ka

basan-e-khak ho pamal-e-rah khalq ai mir

rakhe hai dil mein agar qasd sarfarazi ka