گل شرم سے بہہ جائے گا گلشن میں ہو کر آب سا

گل شرم سے بہہ جائے گا گلشن میں ہو کر آب سا

برقعے سے گر نکلا کہیں چہرہ ترا مہتاب سا

گل برگ کا یہ رنگ ہے مرجاں کا ایسا ڈھنگ ہے

دیکھو نہ جھمکے ہے پڑا وہ ہونٹ لعل ناب سا

وہ مایۂ جاں تو کہیں پیدا نہیں جوں کیمیا

میں شوق کی افراط سے بیتاب ہوں سیماب سا

دل تاب ہی لایا نہ ٹک تا یاد رہتا ہم نشیں

اب عیش روز وصل کا ہے جی میں بھولا خواب سا

سناہٹے میں جان کے ہوش و حواس و دم نہ تھا

اسباب سارا لے گیا آیا تھا اک سیلاب سا

ہم سرکشی سے مدتوں مسجد سے بچ بچ کر چلے

اب سجدے ہی میں گزرے ہے قد جو ہوا محراب سا

تھی عشق کی وہ ابتدا جو موج سی اٹھی کبھو

اب دیدۂ تر کو جو تم دیکھو تو ہے گرداب سا

بہکے جو ہم مست آ گئے سو بار مسجد سے اٹھا

واعظ کو مارے خوف کے کل لگ گیا جلاب سا

رکھ ہاتھ دل پر میرؔ کے دریافت کر کیا حال ہے

رہتا ہے اکثر یہ جواں کچھ ان دنوں بیتاب سا

gul sharm se bah jaega gulshan mein ho kar ab sa

burqae se gar nikla kahin chehra tira mahtab sa

gul barg ka ye rang hai marjan ka aisa dhang hai

dekho na jhamke hai para wo hont laal-e-nab sa

wo maya-e-jan to kahin paida nahin jun kimiya

main shauq ki ifrat se betab hun simab sa

dil tab hi laya na tuk ta yad rahta ham nashin

ab aish roz-e-wasl ka hai ji mein bhula khwab sa

sunahate mein jan ke hosh-o-hawas-o-dam na tha

asbab sara le gaya aya tha ik sailab sa

ham sarkashi se muddaton masjid se bach bach kar chale

ab sajde hi mein guzre hai qad jo hua mehrab sa

thi ishq ki wo ibtida jo mauj si uthi kabhu

ab dida-e-tar ko jo tum dekho to hai girdab sa

bahke jo ham mast a gae sau bar masjid se utha

waiz ko mare khauf ke kal lag gaya julab sa

rakh hath dil par mir ke daryaft kar kya hal hai

rahta hai aksar ye jawan kuchh in dinon betab sa