گل کو محبوب ہم قیاس کیا

گل کو محبوب ہم قیاس کیا

فرق نکلا بہت جو پاس کیا

دل نے ہم کو مثال آئینہ

ایک عالم کا روشناس کیا

کچھ نہیں سوجھتا ہمیں اس بن

شوق نے ہم کو بے حواس کیا

عشق میں ہم ہوئے نہ دیوانے

قیس کی آبرو کا پاس کیا

دور سے چرخ کے نکل نہ سکے

ضعف نے ہم کو مورطاس کیا

صبح تک شمع سر کو دھنتی رہی

کیا پتنگے نے التماس کیا

تجھ سے کیا کیا توقعیں تھیں ہمیں

سو ترے ظلم نے نراس کیا

ایسے وحشی کہاں ہیں اے خوباں

میرؔ کو تم عبث اداس کیا

gul ko mahbub ham qayas kiya

farq nikla bahut jo pas kiya

dil ne ham ko misal-e-aina

ek alam ka rushanas kiya

kuchh nahin sujhta hamen is ban

shauq ne ham ko be hawas kiya

ishq mein ham hue na diwane

qais ki abru ka pas kiya

dur se charkh ke nikal na sake

zof ne ham ko mortas kiya

subh tak sham-e-sar ko dhunti rahi

kya patange ne iltimas kiya

tujh se kya kya tawaqqoen thin hamen

so tire zulm ne niras kiya

aise wahshi kahan hain ai khuban

mir ko tum abas udas kiya