گل کا کیا جو چاک گریباں بہار نے

گل کا کیا جو چاک گریباں بہار نے

دست جنوں لگے مرے کپڑے اتارنے

چھوڑا کہیں نہ مجھ کو نسیم بہار نے

کنج قفس میں بھی مجھے آئی ابھارنے

اب دل کی لاج مشق تصور کے ہاتھ ہے

شیشہ میں اس پری کو چلا ہے اتارنے

ساقی تو ساقی بادہ پرستوں کے پاؤں پر

سجدے کرائے لغزش مستانہ وار نے

اب تو نظر میں دولت کونین ہیچ ہے

جب تجھ کو پا لیا دل امیدوار نے

چشم ادا شناس کو حیران کر دیا

حسن اپنا ذرے ذرے میں دکھلا کے یار نے

بیدمؔ تمہاری آنکھیں ہیں کیا عرش کا چراغ

روشن کیا ہے نقش کف پائے یار نے

gul ka kiya jo chak-e-gareban bahar ne

dast-e-junun lage mire kapre utarne

chhora kahin na mujh ko nasim-e-bahar ne

kunj-e-qafas mein bhi mujhe ai ubharne

ab dil ki laj mashq-e-tasawwur ke hath hai

shisha mein us pari ko chala hai utarne

saqi to saqi bada paraston ke paon par

sajde karae laghzish-e-mastana war ne

ab to nazar mein daulat-e-kaunain hech hai

jab tujh ko pa liya dil-e-umidwar ne

chashm-e-ada shanas ko hairan kar diya

husn apna zarre zarre mein dikhla ke yar ne

bedam tumhari ankhen hain kya arsh ka charagh

raushan kya hai naqsh-e-kaf-e-pae yar ne