گردش جام نہیں رک سکتی

گردش جام نہیں رک سکتی

جو بھی اے گردش دوراں گزرے

صبح محشر ہے بلائے ظاہر

کسی صورت شب ہجراں گزرے

کوئی برسا نہ سر کشت وفا

کتنے بادل گہر افشاں گزرے

ابن آدم کو نہ آیا کوئی راس

کئی آذر کئی یزداں گزرے

اے غم یار تری راہوں سے

عمر بھر سوختہ ساماں گزرے

وہ جو پروانے جلے رات کی رات

منزل عشق سے آساں گزرے

غم ہستی کے بیابانوں سے

کچھ ہمیں تھے جو غزلخواں گزرے

غم کے تاریک افق پر عابدؔ

کچھ ستارے سر مژگاں گزرے

gardish-e-jam nahin ruk sakti

jo bhi ai gardish-e-dauran guzre

subh-e-mahshar hai bala-e-zahir

kisi surat shab-e-hijran guzre

koi barsa na sar-e-kisht-e-wafa

kitne badal guhar afshan guzre

ibn-e-adam ko na aya koi ras

kai azar kai yazdan guzre

ai gham-e-yar tiri rahon se

umr bhar sokhta saman guzre

wo jo parwane jale rat ki rat

manzil-e-ishq se asan guzre

gham-e-hasti ke bayabanon se

kuchh hamen the jo ghazalkhwan guzre

gham ke tarik ufuq par abid

kuchh sitare sar-e-mizhgan guzre