گرمی کی چھٹیاں

مشکل سے پھر اسکول نہ جانے کے دن آئے

بے فکری سے پھر وقت گنوانے کے دن آئے

پھر رات کو چھپ چھپ کے ڈرانے کے دن آئے

سہمے ہوئے لوگوں کو بنانے کے دن آئے

پھر بیٹھ کے طبلہ سا بجانے کے دن آئے

پھر لیٹ کے تنہائی میں گانے کے دن آئے

ہر صبح کو پھر باغ میں جانے کے دن آئے

تو کہہ کے وہ کوئل کو چڑھانے کے دن آئے

پھر عام کا اچار بنانے کے دن آئے

پھر چھپ کے کہیں کیریاں کھانے کے دن آئے

کر دی تھی کتابوں نے ہماری تو زباں بند

گھر بھر میں پھر اک شور مچانے کے دن آئے

وہ دن گئے خوش رہنے کو جب بھولے ہوئے تھے

ہنسنے کے دن آئے ہیں ہنسانے کے دن آئے

اب وقت کا رونا نہیں اب وقت بہت ہے

ہر کام میں پھر دیر لگانے کے دن آئے

گھر پر بھی تھے گھیرے ہوئے اسکول کے دھندے

آزادی سے اب موج اڑانے کے دن آئے

بہنوں کو ستایا کبھی بھائی کو چڑھایا

لڑنے کے دن آئے ہیں لڑانے کے دن آئے

پھر پھولوں سے لدنے لگا ہر بیلے کا پورا

پودوں میں سے پھر پھول چرانے کے دن آئے

کھولے گئے پھر گرد سے لپٹے ہوئے پردے

دوپہر کو پھر رات بنانے کے دن آئے

پھر لوٹیں گے ہم چاندنی راتوں کی بہاریں

پھر چھت پہ پلنگوں کے بچھانے کے دن آئے

کیوں اب بھی پسینے میں شرابور ہو افسرؔ

ندی پہ کہیں جا کے نہانے کے دن آئے

mushkil se phir iskul na jane ke din ae

be fikri se phir waqt ganwane ke din ae

phir rat ko chhup chhup ke darane ke din ae

sahme hue logon ko banane ke din ae

phir baith ke tabla sa bajane ke din ae

phir let ke tanhai mein gane ke din ae

har subh ko phir bagh mein jane ke din ae

tu kah ke wo koyal ko charhane ke din ae

phir am ka achar banane ke din ae

phir chhup ke kahin kairiyan khane ke din ae

kar di thi kitabon ne hamari to zaban band

ghar bhar mein phir ik shor machane ke din ae

wo din gae khush rahne ko jab bhule hue the

hansne ke din ae hain hansane ke din ae

ab waqt ka rona nahin ab waqt bahut hai

har kam mein phir der lagane ke din ae

ghar par bhi the ghere hue iskul ke dhande

azadi se ab mauj urane ke din ae

bahnon ko sataya kabhi bhai ko charhaya

larne ke din ae hain larane ke din ae

phir phulon se ladne laga har bele ka pura

paudon mein se phir phul churane ke din ae

khole gae phir gard se lipte hue parde

dopahar ko phir rat banane ke din ae

phir lautenge ham chandni raton ki baharen

phir chhat pe palangon ke bichhane ke din ae

kyun ab bhi pasine mein sharabur ho afsar

naddi pe kahin ja ke nahane ke din ae