گر یاد میں ساقی کی ساغر نظر آ جائے

گر یاد میں ساقی کی ساغر نظر آ جائے

پیمانۂ دل چھلکے منہ کو جگر آ جائے

عکس رخ ساقی کو گر دیکھ لوں ساغر میں

کچھ دل کے بہلنے کی صورت نظر آ جائے

تیار رہو ہر دم مرنے پہ کمر باندھے

در پیش خدا جانے کب یہ سفر آ جائے

ہاں سیر تو کر غافل اس گور غریباں کی

انجام تجھے اپنا شاید نظر آ جائے

پھر جائیں ہمیشہ کو دنیا سے مری آنکھیں

مرتے دم اگر جلوہ تیرا نظر آ جائے

شور نفس بلبل سے ہوش اڑیں سب کے

گر زمزمہ سنجی پر یہ مشت پر آ جائے

بیمار محبت کی اب ہے یہ دعا ہر دم

پھر شام نہ ہو جس کی ایسی سحر آ جائے

بہتر ہے خم و ساغر آنکھوں سے رہیں اوجھل

ایسا نہ ہو شیشے پر دل ٹوٹ کر آ جائے

یاسؔ آپ کی بے جرمی آڑے نہیں آ سکتی

گر بات پر اپنی وہ بیداد گر آ جائے

gar yad mein saqi ki saghar nazar a jae

paimana-e-dil chhalke munh ko jigar a jae

aks-e-rukh saqi ko gar dekh lun saghar mein

kuchh dil ke bahalne ki surat nazar a jae

tayyar raho har dam marne pe kamar bandhe

dar pesh-e-khuda jane kab ye safar a jae

han sair to kar ghafil is gor-e-ghariban ki

anjam tujhe apna shayad nazar a jae

phir jaen hamesha ko duniya se miri ankhen

marte dam agar jalwa tera nazar a jae

shor-e-nafas bulbul se hosh uren sab ke

gar zamzama sanji par ye musht par a jae

bimar-e-mohabbat ki ab hai ye dua har dam

phir sham na ho jis ki aisi sahar a jae

behtar hai kham-o-saghar ankhon se rahen ojhal

aisa na ho shishe par dil tut kar a jae

yas ap ki be jurmi are nahin a sakti

gar bat par apni wo bedad gar a jae