گری گر کر اٹھی پلٹی تو جو کچھ تھا اٹھا لائی

گری گر کر اٹھی پلٹی تو جو کچھ تھا اٹھا لائی

نظر کیا کیمیا تھی رنگ چہروں سے اڑا لائی

خدا کے واسطے سفاکیاں یہ کس سے سیکھی ہیں

نظر سے پیار مانگا تھا وہ اک خنجر اٹھا لائی

نہ حسرت ہی نکلتی ہے نہ دل کو آگ لگتی ہے

مری ہستی مرے دامن میں کیا کانٹا لگا لائی

وہ سب بدمستیاں تھیں زر کی اب زر ہے نہ پیتے ہیں

ہماری مفلسی خود راہ پر ہم کو لگا لائی

مٹانے کو ہمارے یہ زمین و آسماں دونوں

ہمیشہ مل کے چلتے ہیں بہ ایں پستی و بالائی

جو کچھ دیکھا نہ دیکھا جو سنی وہ ان سنی شاعرؔ

نہ آئے ہم یہاں یہ زندگی مفت خدا لائی

giri gir kar uthi palti to jo kuchh tha utha lai

nazar kya kimiya thi rang chehron se ura lai

khuda ke waste saffakiyan ye kis se sikhi hain

nazar se pyar manga tha wo ik khanjar utha lai

na hasrat hi nikalti hai na dil ko ag lagti hai

miri hasti mire daman mein kya kanta laga lai

wo sab badmastiyan thin zar ki ab zar hai na pite hain

hamari muflisi khud rah par ham ko laga lai

mitane ko hamare ye zamin-o-asman donon

hamesha mil ke chalte hain ba ain pasti-o-balai

jo kuchh dekha na dekha jo suni wo an suni shayar

na ae ham yahan ye zindagi muft-e-khuda lai