گرنے کا بہت ڈر ہے اے دل نہ پھسل جانا

گرنے کا بہت ڈر ہے اے دل نہ پھسل جانا

اس بام محبت پر مشکل ہے سنبھل جانا

دل میری سنے کیوں کر سمجھاؤں اسے کیا میں

وحشت نے سکھایا ہے قابو سے نکل جانا

وہ تیرے فقیروں کو آنکھوں سے ذرا دیکھے

جس نے نہیں دیکھا ہے قسمت کا بدل جانا

دکھلاؤ رخ زیبا تا مجھ کو قرار آئے

آساں نہیں عاشق کا باتوں میں بہل جانا

کمزور کیا مجھ کو اب ضعف نقاہت نے

اے عشق ذرا میرے پہلو کو بدل جانا

جلنا تمہیں اس دل کا میں آج دکھاؤں گا

تم نے نہیں دیکھا ہے اک پرچے کا جل جانا

عاشق تری محفل سے اٹھتا ہے یہی کہہ کر

یاں مجمع دشمن ہے اب چاہیے ٹل جانا

سر گشتگئ عاشق کیا تم کو بتاؤں میں

تقدیر بدلنا ہے آنکھوں کا بدل جانا

نادان طبیبوں کو کیا نبض دکھاؤں میں

آزار محبت کو سودا کا خلل جانا

وحشت ہے فزوں دل کی تنہا نہ چلا جائے

لازم ہے جمیلہؔ اب صحرا کو نکل جانا

girne ka bahut dar hai ai dil na phisal jana

is bam-e-mohabbat par mushkil hai sambhal jana

dil meri sune kyun kar samjhaun use kya main

wahshat ne sikhaya hai qabu se nikal jana

wo tere faqiron ko ankhon se zara dekhe

jis ne nahin dekha hai qismat ka badal jana

dikhlao rukh zeba ta mujh ko qarar ae

asan nahin ashiq ka baton mein bahal jana

kamzor kiya mujh ko ab zof naqahat ne

ai ishq zara mere pahlu ko badal jana

jalna tumhen is dil ka main aj dikhaunga

tum ne nahin dekha hai ik parche ka jal jana

ashiq tiri mahfil se uthta hai yahi kah kar

yan majmaa dushman hai ab chahiye tal jana

sar gashtagi-e-ashiq kya tum ko bataun main

taqdir badalna hai ankhon ka badal jana

nadan tabibon ko kya nabz dikhaun main

azar mohabbat ko sauda ka khalal jana

wahshat hai fuzun dil ki tanha na chala jae

lazim hai jamilahu ab sahra ko nikal jana