Arooz is now on the App Store, for iPhone and iPad. Download →

All poetry

گرم رفتار ہے تیری یہ پتا دیتے ہیں

Rasheed Lakhnavi (d. 1904)

گرم رفتار ہے تیری یہ پتا دیتے ہیں

دم بہ دم لو ترے نقش کف پا دیتے ہیں

ہجر سے کرتے ہیں ناشاد ہمیں وصل سے شاد

خود مرض دیتے ہیں اور آپ شفا دیتے ہیں

دل کی تم بات سمجھتے ہو زباں گو نہ ہلے

خوب سنتے ہو جو چپکے سے صدا دیتے ہیں

کم نہ سمجھیں مری آہوں کے شراروں کو حضور

آگ ابھی سارے زمانے میں لگا دیتے ہیں

تم نے احسان کیا ہے کہ نمک چھڑکا ہے

اب مجھے زخم جگر اور مزا دیتے ہیں

ان کی تقدیر میں ہے میرے لہو میں بھرنا

خون کی بو ترے دامان قبا دیتے ہیں

صاف کرتے ہیں ابھی غیر یہ وہ تیغ ادا

دوست آ کے مجھے پیغام قضا دیتے ہیں

جاگو اے مملکت عشق کے سونے والو

شب کو دربان در یار صدا دیتے ہیں

جتنے شاعر ہیں انہوں نے ہمیں عزت دی ہے

ہم رشیدؔ ان کو شب و روز دعا دیتے ہیں