کیوں وصل میں بھی آنکھ ملائی نہیں جاتی

کیوں وصل میں بھی آنکھ ملائی نہیں جاتی

وہ فرق دلوں کا وہ جدائی نہیں جاتی

کیا دھوم بھی نالوں سے مچائی نہیں جاتی

سوتی ہوئی تقدیر جگائی نہیں جاتی

کچھ شکوہ نہ کرتے نہ بگڑتا وہ شب وصل

اب ہم سے کوئی بات بنائی نہیں جاتی

دیکھو تو ذرا خاک میں ہم ملتے ہیں کیونکر

یہ نیچی نگہ اب بھی اٹھائی نہیں جاتی

کہتی ہے شب ہجر بہت زندہ رہوگے

مانگا کرو تم موت ابھی آئی نہیں جاتی

وہ ہم سے مکدر ہیں تو ہم ان سے مکدر

کہہ دیتے ہیں صاف اپنی صفائی نہیں جاتی

ہم صلح بھی کر لیں تو چلی جاتی ہے ان میں

باہم دل و دلبر کی لڑائی نہیں جاتی

خود دل میں چلے آؤ گے جب قصد کرو گے

یہ راہ بتانے سے بتائی نہیں جاتی

چھپتی ہے جلالؔ آنکھوں میں کب حسرت دیدار

سو پردے اگر ہوں تو چھپائی نہیں جاتی

kyun wasl mein bhi ankh milai nahin jati

wo farq dilon ka wo judai nahin jati

kya dhum bhi nalon se machai nahin jati

soti hui taqdir jagai nahin jati

kuchh shikwa na karte na bigarta wo shab-e-wasl

ab ham se koi bat banai nahin jati

dekho to zara khak mein ham milte hain kyunkar

ye nichi nigah ab bhi uthai nahin jati

kahti hai shab-e-hijr bahut zinda rahoge

manga karo tum maut abhi ai nahin jati

wo ham se mukaddar hain to ham un se mukaddar

kah dete hain saf apni safai nahin jati

ham sulh bhi kar len to chali jati hai un mein

baham dil-o-dilbar ki larai nahin jati

khud dil mein chale aoge jab qasd karoge

ye rah batane se batai nahin jati

chhupti hai jalal ankhon mein kab hasrat-e-didar

so parde agar hun to chhupai nahin jati