گئی جو طفلی تو پھر عالم شباب آیا

گئی جو طفلی تو پھر عالم شباب آیا

گیا شباب تو اب موسم خضاب آیا

میں شوق وصل میں کیا ریل پر شتاب آیا

کہ صبح ہند میں تھا شام پنچ آب آیا

کٹا تھا روز مصیبت خدا خدا کر کے

یہ رات آئی کہ سر پہ مرے عذاب آیا

کہاں ہے دل کو عبث ڈھونڈھتے ہو پہلو میں

تمہارے کوچے میں مدت سے اس کو داب آیا

کسی کی تیغ تغافل کا میں وہ کشتہ ہوں

نہ جاگا نیزے پہ سو بار آفتاب آیا

نظر پڑی نہ مری رعب حسن سے رخ پر

اگرچہ سامنے میرے وو بے نقاب آیا

ہمیشہ صورت انجم کھلی رہیں آنکھیں

فراق یار میں کس روز مجھ کو خواب آیا

ہوا یقیں کہ زمیں پر ہے آج چاند گہن

وو ماہ چہرہ پہ جب ڈال کر نقاب آیا

ہوئے جو دیدۂ گریہ سے اپنے اشک رواں

گماں ہوا کہ برستا ہوا سحاب آیا

بنا تصور لیلیٰ بہ صورت تصویر

کبھی جو قیس کی آنکھوں میں شب کو خواب آیا

وہ زود رنج ہے اس کو نہ چھیڑنا رعناؔ

ملو گے ہاتھ اگر بر سر عتاب آیا

gai jo tifli to phir alam-e-shabab aya

gaya shabab to ab mausam-e-khizab aya

main shauq-e-wasl mein kya rel par shitab aya

ke subh hind mein tha sham panch ab aya

kata tha roz musibat khuda khuda kar ke

ye rat ai ke sar pe mire azab aya

kahan hai dil ko abas dhundhte ho pahlu mein

tumhare kuche mein muddat se us ko dab aya

kisi ki tegh-e-taghaful ka main wo kushta hun

na jaga neze pe sau bar aftab aya

nazar pari na miri rob-e-husn se rukh par

agarche samne mere wo be naqab aya

hamesha surat anjum khuli rahen ankhen

firaq-e-yar mein kis roz mujh ko khwab aya

hawa yaqin ke zamin par hai aj chand gahan

wo mah chehra pe jab dal kar naqab aya

hue jo dida-e-girya se apne ashk-e-rawan

guman hua ke barasta hua sahab aya

bana tasawwur laila ba surat-e-taswir

kabhi jo qais ki ankhon mein shab ko khwab aya

wo zud ranj hai us ko na chherna raana

miloge hath agar bar sar-e-itab aya