گئی چھاؤں اس تیغ کی سر سے جب کی

گئی چھاؤں اس تیغ کی سر سے جب کی

جلے دھوپ میں یاں تلک ہم کہ تب کی

پڑی خرمن گل پہ بجلی سی آخر

مرے خوش نگہ کی نگاہ اک غضب کی

کوئی بات نکلے ہے دشوار منہ سے

ٹک اک تو بھی تو سن کسی جاں بہ لب کی

تو شملہ جو رکھتا ہے خر ہے وگرنہ

ضرورت ہے کیا شیخ دم اک وجب کی

یکایک بھی آ سر پہ واماندگاں کے

بہت دیکھتے ہیں تری راہ کب کی

دماغ و جگر دل مخالف ہوئے ہیں

ہوئی متفق اب ادھر رائے سب کی

تجھے کیونکے ڈھونڈوں کہ سوتے ہی گزری

تری راہ میں اپنے پیے طلب کی

دل عرش سے گزرے ہے ضعف میں بھی

یہ زور آوری دیکھو زاری شب کی

عجب کچھ ہے گر میرؔ آوے میسر

گلابی شراب اور غزل اپنے ڈھب کی

gai chhaon is tegh ki sar se jab ki

jale dhup mein yan talak ham ke tab ki

pari khirman-e-gul pe bijli si akhir

mire khush nigah ki nigah ik ghazab ki

koi bat nikle hai dushwar munh se

tuk ik tu bhi to sun kisi jan ba lab ki

tu shamla jo rakhta hai khar hai wagarna

zarurat hai kya shaikh dam ik wajab ki

yakayak bhi a sar pe wamandagan ke

bahut dekhte hain tiri rah kab ki

dimagh-o-jigar dil mukhalif hue hain

hui muttafiq ab idhar rae sab ki

tujhe kyunke dhundun ke sote hi guzri

tiri rah main apne piye talab ki

dil-e-arsh se guzre hai zof mein bhi

ye zor awari dekho zari-e-shab ki

ajab kuchh hai gar mir awe muyassar

gulabi sharab aur ghazal apne dhab ki