کیوں نہ کہیں بشر کو ہم آتش و آب و خاک و باد

کیوں نہ کہیں بشر کو ہم آتش و آب و خاک و باد

قدرت حق سے ہیں بہم آتش و آب و خاک و باد

اخگر غنچہ آب جو گرد چمن نسیم صبح

ہیں یہ گرہ کشائے غم آتش و آب و خاک و باد

حقے کو اہل معرفت کیوں کہ نہ سمجھیں ہمدم اب

یہ بھی رکھے ہے بیش و کم آتش و آب و خاک و باد

سوزش داغ و آبلہ گرد الم شمار دم

ہجر میں چاروں ہیں بہم آتش و آب و خاک و باد

برق و سحاب و گرد باد دشت جنوں میں ساتھ ہیں

ہیں یہ مرے رفیق دم آتش و آب و خاک و باد

رو و عرق غبار خط جنبش زلف کی ہوا

چاروں ہیں دل کے حق میں سم آتش و آب و خاک و باد

چشم میں آتشیں ہیں اشک دل میں غبار آہ سرد

دونوں سے لیتے ہیں جنم آتش و آب و خاک و باد

مجھ کو خدائی کی قسم رکھتے ہیں گھیرے دم بدم

تیرے یہ عشق میں صنم آتش و آب و خاک و باد

کیوں نہ حواس خمسہ گم اہل سخن کے ہوں نصیرؔ

تجھ ہی سے بس ہوئے رقم آتش و آب و خاک و باد