کیوں نہ ہوں حیراں تری ہر بات کا

کیوں نہ ہوں حیراں تری ہر بات کا

حسن مرقع ہے طلسمات کا

روؤں تو خوش ہو کے پیے ہے وہ مے

سمجھے ہے موسم اسے برسات کا

اٹھتی جوانی جو ہے تو دن بہ دن

اور ہی عالم ہے کچھ اس گات کا

گھر میں بلایا ہے تو کچھ منہ سے دو

سیکھو یہ ڈھب ہم سے مدارات کا

شیخ جواں ہوگا تو پی دیکھ اسے

شیشے میں پانی ہے کرامات کا

ہم نہ ملیں تم سے تو نکلے ہے جاں

اور تمہیں عالم ہے مساوات کا

اس نے کی اب کم سخنی اختیار

جس کو مزہ تھا مری ہر بات کا

آنکھ بھی ملتی ہے تو نا آشنا

اب وہ کہاں لطف اشارات کا

رونے کی جا ہے سن اسے ہم نشیں

تو تو ہے محرم مرے اوقات کا

حکم ہوا رات کو آؤ نہ یاں

دن کو رکھو طور ملاقات کا

دل کے اٹکتے ہی ہوا ہے ستم

فرق ملاقات میں دن رات کا

بات نئی سوجھے ہے جرأتؔ تجھے

میں تو ہوں عاشق تری اس بات کا

kyun na hun hairan tiri har bat ka

husn muraqqaa hai tilismat ka

roun to khush ho ke piye hai wo mai

samjhe hai mausam use barsat ka

uthti jawani jo hai to din ba din

aur hi alam hai kuchh is gat ka

ghar mein bulaya hai to kuchh munh se do

sikho ye dhab ham se madarat ka

shaikh jawan hoga to pi dekh use

shishe mein pani hai karamat ka

ham na milen tum se to nikle hai jan

aur tumhen alam hai musawat ka

us ne ki ab kam sukhani ikhtiyar

jis ko maza tha miri har bat ka

ankh bhi milti hai to na ashna

ab wo kahan lutf isharat ka

rone ki ja hai sun use ham nashin

tu to hai mahram mire auqat ka

hukm hua rat ko ao na yan

din ko rakho tur mulaqat ka

dil ke atakte hi hua hai sitam

farq mulaqat mein din rat ka

bat nai sujhe hai jurat tujhe

main to hun ashiq tiri is bat ka