کیوں خال رخ محبوب کا احساں ہوتا
صفدر مرزا پوریکیوں خال رخ محبوب کا احساں ہوتا
دل جلا تھا تو چراغ شب ہجراں ہوتا
عید ہوتی ترے دیوانے کی آتی جو بہار
جھک کے دامن سے ہم آغوش گریباں ہوتا
شب مہتاب میں وہ رخ سے الٹتے جو نقاب
گرد پھر پھر کے تصدق مہ تاباں ہوتا
خیر گزری کہ تری بزم میں بے ہوش تھے سب
ورنہ جو ہوش میں آتا وہ پشیماں ہوتا
واسطے میں نے شب وصل خدا کے بھی دئے
مان ہی جاتا وہ کافر جو مسلماں ہوتا
اے جنوں مجھ سے قسم لے کہ بہت مفلس ہوں
کیا کفن کے لئے رکھا جو گریباں ہوتا
ٹھوکریں وادئ غربت کی نہ کھاتا صفدرؔ
اے فلک اس کا بھرا گھر جو نہ ویراں ہوتا
kyun khal-e-rukh mahbub ka ehsan hota
dil jala tha to charagh-e-shab-e-hijran hota
eid hoti tire diwane ki ati jo bahar
jhuk ke daman se ham aghosh gareban hota
shab-e-mahtab mein wo rukh se ulatte jo naqab
gard phir phir ke tasadduq mah-e-taban hota
khair guzri ke tiri bazm mein be hosh the sab
warna jo hosh mein ata wo pasheman hota
waste main ne shab-e-wasl-e-khuda ke bhi diye
man hi jata wo kafir jo musalman hota
ai junun mujh se qasam le ke bahut muflis hun
kya kafan ke liye rakha jo gareban hota
thokaren wadi-e-ghurbat ki na khata safdar
ai falak us ka bhara ghar jo na wiran hota