کیوں دیکھیے نہ حسن خداداد کی طرف

کیوں دیکھیے نہ حسن خداداد کی طرف

لازم نظر ہے گلشن ایجاد کی طرف

پائے جو تیرے گوشۂ دستار کی ہوا

قمری اڑی نہ طرۂ شمشاد کی طرف

بے اصل اے فلک نظر آتا ہے تو مجھے

کرتا ہوں غور جب تری بنیاد کی طرف

گلشن میں کون بلبل نالاں کو دے پناہ

گلچیں و باغباں بھی ہیں صیاد کی طرف

مظلوم ہوں مگر نہیں ملتا کوئی گواہ

ہیں اہل حشر اس ستم ایجاد کی طرف

ناداں کہیں پناہ نہیں موت سے تجھے

کیا دیکھتا ہے قلعۂ فولاد کی طرف

ہم جنس کو ضرور ہے ہم جنس کا خیال

رغبت نہ ہو بشر کو پری زاد کی طرف

مضموں کمر کا ہاتھ نہ آیا جو دہر میں

جانا پڑا مجھے عدم آباد کی طرف

تکلیف جوئے شیر کی دے کر جو تھی خجل

شیریں نہ دیکھ سکتی تھی فرہاد کی طرف

فصاد کی نگاہ ہے حداد کی طرف

گردن جھکائے شوق شہادت میں ہوں رواں

دل لے چلا ہے کوچۂ جلاد کی طرف

امیدوار چشم عنایت کا ہے غریب

دیکھو تو اک نظر دل ناشاد کی طرف

ناصح اگر ستم نہ سہیں ہم تو کیا کریں

دل دوڑتا ہے یار کی بیداد کی طرف

بلبل سمجھ رہی ہے کہ گلہائے خندہ رو

رکھتے ہیں کان نالہ و فریاد کی طرف

فضل خدا سے اپنی طبیعت ہے بے نیاز

روئے طلب کبھی نہ ہوا داد کی طرف

واعظ سے سن کے قامت توبہ کی خوبیاں

دوڑا خیال اک قد آزاد کی طرف

بھولے ہوئے ہیں سارے زمانے کی نعمتیں

میلان دل جنہیں ہے تیری یاد کی طرف

یا شاہ جن و انس اثرؔ پر بھی اک نظر

رکھتا ہے آنکھ آپ کی امداد کی طرف

kyun dekhiye na husn-e-khudadad ki taraf

lazim nazar hai gulshan-e-ijad ki taraf

pae jo tere gosha-e-dastar ki hawa

qumri uri na turra-e-shamshad ki taraf

be asl ai falak nazar ata hai to mujhe

karta hun ghaur jab tiri buniyad ki taraf

gulshan mein kaun bulbul-e-nalan ko de panah

gulchin-o-baghban bhi hain sayyad ki taraf

mazlum hun magar nahin milta koi gawah

hain ahl-e-hashr us sitam ijad ki taraf

nadan kahin panah nahin maut se tujhe

kya dekhta hai qila-e-faulad ki taraf

ham jins ko zarur hai ham jins ka khayal

raghbat na ho bashar ko pari zad ki taraf

mazmun kamar ka hath na aya jo dahr mein

jana para mujhe adam abad ki taraf

taklif ju-e-sher ki de kar jo thi khajil

shirin na dekh sakti thi farhad ki taraf

fassad ki nigah hai haddad ki taraf

gardan jhukae shauq-e-shahadat mein hun rawan

dil le chala hai kucha-e-jallad ki taraf

umidwar chashm-e-inayat ka hai gharib

dekho to ik nazar dil-e-nashad ki taraf

naseh agar sitam na sahen ham to kya karen

dil daurta hai yar ki bedad ki taraf

bulbul samajh rahi hai ke gulhae khanda ru

rakhte hain kan nala-o-fariyad ki taraf

fazl-e-khuda se apni tabiat hai be niyaz

ru-e-talab kabhi na hua dad ki taraf

waiz se sun ke qamat-e-tauba ki khubiyan

daura khayal ik qad-e-azad ki taraf

bhule hue hain sare zamane ki nematen

mailan-e-dil jinhen hai teri yad ki taraf

ya shah jin-o-uns asar par bhi ik nazar

rakhta hai ankh ap ki imdad ki taraf