کیوں شوق بڑھ گیا رمضاں میں سنگار کا

کیوں شوق بڑھ گیا رمضاں میں سنگار کا

روزہ نہ ٹوٹ جائے کسی روزہ دار کا

ان کا وہ شوخیوں سے پھڑکنا پلنگ پر

وہ چھاتیوں پہ لوٹنا پھولوں کے ہار کا

حور آئے خلد سے تو بٹھاؤں کہاں اسے

آراستہ ہو ایک تو کونا مزار کا

شیشوں نے طرز اڑائی رکوع و قیام کی

کیا ان میں ہے لہو کسی پرہیزگار کا

کیوں غش ہوئے کلیم تجلی طور پر

وہ اک چراغ تھا مرے دل کے مزار کا

بعد فنا بھی صاف نہیں دل رقیب سے

گنبد کھڑا ہوا ہے لحد پر غبار کا

کثرت کا رنگ شاہد وحدت کا ہے بناؤ

وہ ایک ہی سے نام ہے ہژدہ ہزار کا

ناقوس بن کے پوچھنے جاؤں اگر مزاج

بت بھی کہیں گے شکر ہے پروردگار کا

دولہا کی یہ برات ہے رسمیں ادا کرو

در پر جنازہ آیا ہے اک جاں نثار کا

کیا کیا تڑپ تڑپ کے سرافیل گر پڑے

دم آ گیا جو صور میں مجھ بے قرار کا

سرمہ کے ساتھ پھیل کے کیا وہ بھی مٹ گیا

کیوں نام تک نہیں تری آنکھوں میں پیار کا

کیا رات سے کسی کی نظر لگ گئی اسے

اچھا نہیں مزاج دل بے قرار کا

آنکھیں مری فقیر ہوئیں شوق دید میں

تسمہ کمر میں ہے نگۂ انتظار کا

لوٹوں مزے جو بازیٔ شطرنج جیت لوں

اس کھیل میں تو وعدہ ہے بوس کنار کا

اللہ مرا غفور محمد مرے شفیع

مائلؔ کو خوف کچھ نہیں روز شمار کا

kyun shauq barh gaya ramzan mein singar ka

roza na tut jae kisi roza dar ka

un ka wo shokhiyon se pharakna palang par

wo chhatiyon pe lautna phulon ke har ka

hur ae khuld se to bithaun kahan use

arasta ho ek to kona mazar ka

shishon ne tarz urai ruku-o-qayam ki

kya un mein hai lahu kisi parhaizgar ka

kyun ghash hue kalim tajalli-e-tur par

wo ik charagh tha mire dil ke mazar ka

baad-e-fana bhi saf nahin dil raqib se

gumbad khara hua hai lahad par ghubar ka

kasrat ka rang shahid wahdat ka hai banao

wo ek hi se nam hai hazhda hazar ka

naqus ban ke puchhne jaun agar mizaj

but bhi kahenge shukr hai parwardigar ka

dolaha ki ye barat hai rasmen ada karo

dar par janaza aya hai ik jan nisar ka

kya kya tarap tarap ke sarafil gir pare

dam a gaya jo sur mein mujh be qarar ka

surma ke sath phail ke kya wo bhi mit gaya

kyun nam tak nahin tiri ankhon mein pyar ka

kya rat se kisi ki nazar lag gai use

achchha nahin mizaj-e-dil-e-be qarar ka

ankhen miri faqir huin shauq-e-did mein

tasma kamar mein hai nigah-e-intizar ka

lautun maze jo bazi-e-shatranj jit lun

is khel mein to waada hai bos-e-kanar ka

allah mira ghafur mohammad mire shafi

mail ko khauf kuchh nahin roz-e-shumar ka