کیا کہیے کہ اب اس کی صدا تک نہیں آتی

کیا کہیے کہ اب اس کی صدا تک نہیں آتی

اونچی ہوں فصیلیں تو ہوا تک نہیں آتی

شاید ہی کوئی آ سکے اس موڑ سے آگے

اس موڑ سے آگے تو قضا تک نہیں آتی

وہ گل نہ رہے نکہت گل خاک ملے گی

یہ سوچ کے گلشن میں صبا تک نہیں آتی

اس شور تلاطم میں کوئی کس کو پکارے

کانوں میں یہاں اپنی صدا تک نہیں آتی

خوددار ہوں کیوں آؤں در اہل کرم پر

کھیتی کبھی خود چل کے گھٹا تک نہیں آتی

اس دشت میں قدموں کے نشاں ڈھونڈ رہے ہو

پیڑوں سے جہاں چھن کے ضیا تک نہیں آتی

یا جاتے ہوئے مجھ سے لپٹ جاتی تھیں شاخیں

یا میرے بلانے سے صبا تک نہیں آتی

کیا خشک ہوا روشنیوں کا وہ سمندر

اب کوئی کرن آبلہ پا تک نہیں آتی

چھپ چھپ کے سدا جھانکتی ہیں خلوت گل میں

مہتاب کی کرنوں کو حیا تک نہیں آتی

یہ کون بتائے عدم آباد ہے کیسا

ٹوٹی ہوئی قبروں سے صدا تک نہیں آتی

بہتر ہے پلٹ جاؤ سیہ خانۂ غم سے

اس سرد گپھا میں تو ہوا تک نہیں آتی

kya kahiye ke ab us ki sada tak nahin ati

unchi hun fasilen to hua tak nahin ati

shayad hi koi a sake is mor se age

is mor se age to qaza tak nahin ati

wo gul na rahe nikhat-e-gul khak milegi

ye soch ke gulshan mein saba tak nahin ati

is shor-e-talatum mein koi kis ko pukare

kanon mein yahan apni sada tak nahin ati

khuddar hun kyun aun dar ahl-e-karam par

kheti kabhi khud chal ke ghata tak nahin ati

is dasht mein qadmon ke nishan dhund rahe ho

peron se jahan chhin ke ziya tak nahin ati

ya jate hue mujh se lipat jati thin shakhen

ya mere bulane se saba tak nahin ati

kya khushk hua raushniyon ka wo samundar

ab koi kiran abla pa tak nahin ati

chhup chhup ke sada jhankti hain khalwat gul mein

mahtab ki kirnon ko haya tak nahin ati

ye kaun batae adam abad hai kaisa

tuti hui qabron se sada tak nahin ati

behtar hai palat jao siyah khana-e-gham se

is sard gupha mein to hua tak nahin ati