کیا گزر کیجئے صیاد دل آزار کے پاس

کیا گزر کیجئے صیاد دل آزار کے پاس

برگ گل پھینکتا ہے مرغ گرفتار کے پاس

تیرے بیمار کی بالیں پہ کھڑی ہے حسرت

موت بیٹھی نظر آتی ہے وہ غم خوار کے پاس

بار بار آ کے وہ ٹھہراتے ہیں سودا دل کا

گھر انہوں نے جو بنایا ہے تو بازار کے پاس

شاخ گل دیکھ کے سامان خلش یاد آیا

رکھ دیا پارۂ دل دل کو ہر خار کے پاس

تیرے دروازہ پہ فتنوں نے لیا دم آ کر

تھک کے بیٹھی ہے قیامت تری دیوار کے پاس

زاہدا رحمت باری بھی برنگ توبہ

آ گئی ٹوٹ کے رندان قدح خوار کے پاس

میری خواری ہی قیامت میں مرے کام آئی

کوئی آیا نہ وفاؔ مجھ سے گنہ گار کے پاس

kya guzar kijiye sayyad dil azar ke pas

barg-e-gul phenkta hai murgh-e-giraftar ke pas

tere bimar ki balin pe khari hai hasrat

maut baithi nazar ati hai wo gham khwar ke pas

bar bar a ke wo thahrate hain sauda dil ka

ghar unhon ne jo banaya hai to bazar ke pas

shakh-e-gul dekh ke saman khalish yad aya

rakh diya para-e-dil dil ko har khar ke pas

tere darwaza pe fitnon ne liya dam a kar

thak ke baithi hai qayamat tiri diwar ke pas

zahda rahmat-e-bari bhi barang-e-tauba

a gai tut ke rindan-e-qadah khwar ke pas

meri khwari hi qayamat mein mire kam ai

koi aya na wafa mujh se gunah gar ke pas