تری نگاہ کا انداز کیا نظر آیا

تری نگاہ کا انداز کیا نظر آیا

درخت سے ہمیں سایہ جدا نظر آیا

بہت قریب سے آواز ایک آئی تھی

مگر چلے تو بڑا فاصلہ نظر آیا

یہ راستے کی لکیریں بھی گم نہ ہو جائیں

وہ جھاڑیوں کا نیا سلسلہ نظر آیا

یہ روشنی کی کرن ہے کہ آگ کا شعلہ

ہر ایک گھر مجھے جلتا ہوا نظر آیا

کلی کلی کی صدا گونجنے لگی دل میں

جہاں بھی کوئی چمن آشنا نظر آیا

سنو تو کس لیے پتھر اٹھائے پھرتے ہو

کہو تو آئینہ خانے میں کیا نظر آیا

یہ دوپہر یہ پگھلتی ہوئی سڑک باقیؔ

ہر ایک شخص پھسلتا ہوا نظر آیا

tiri nigah ka andaz kya nazar aya

darakht se hamen saya juda nazar aya

bahut qarib se awaz ek ai thi

magar chale to bara fasla nazar aya

ye raste ki lakiren bhi gum na ho jaen

wo jhariyon ka naya silsila nazar aya

ye raushni ki kiran hai ke ag ka shola

har ek ghar mujhe jalta hua nazar aya

kali kali ki sada gunjne lagi dil mein

jahan bhi koi chaman ashna nazar aya

suno to kis liye patthar uthae phirte ho

kaho to aina khane mein kya nazar aya

ye dopahar ye pighalti hui sarak baqi

har ek shakhs phisalta hua nazar aya