کیا کہیے کہ خوباں نے اب ہم میں ہے کیا رکھا

کیا کہیے کہ خوباں نے اب ہم میں ہے کیا رکھا

ان چشم سیاہوں نے بہتوں کو سلا رکھا

جلوہ ہے اسی کا سب گلشن میں زمانے کے

گل پھول کو ہے ان نے پردہ سا بنا رکھا

جوں برگ خزاں دیدہ سب زرد ہوئے ہم تو

گرمی نے ہمیں دل کی آخر کو جلا رکھا

کہیے جو تمیز اس کو کچھ اچھے برے کی ہو

دل جس کسو کا پایا چٹ ان نے اڑا رکھا

تھی مسلک الفت کی مشہور خطرناکی

میں دیدہ و دانستہ کس راہ میں پا رکھا

خورشید و قمر پیارے رہتے ہیں چھپے کوئی

رخساروں کو گو تو نے برقع سے چھپا رکھا

چشمک ہی نہیں تازی شیوے یہ اسی کے ہیں

جھمکی سی دکھا دے کر عالم کو لگا رکھا

لگنے کے لیے دل کے چھڑکا تھا نمک میں نے

سو چھاتی کے زخموں نے کل دیر مزہ رکھا

کشتے کو اس ابرو کے کیا میل ہو ہستی کی

میں طاق بلند اوپر جینے کو اٹھا رکھا

قطعی ہے دلیل اے میرؔ اس تیغ کی بے آبی

رحم ان نے مرے حق میں مطلق نہ روا رکھا

kya kahiye ke khuban ne ab ham mein hai kya rakha

un chashm siyahon ne bahuton ko sula rakha

jalwa hai usi ka sab gulshan mein zamane ke

gul phul ko hai un ne parda sa bana rakha

jun barg-e-khizan dida sab zard hue ham to

garmi ne hamen dil ki akhir ko jala rakha

kahiye jo tamiz us ko kuchh achchhe bure ki ho

dil jis kisu ka paya chat un ne ura rakha

thi maslak-e-ulfat ki mashhur khatarnaki

main dida-o-danista kis rah mein pa rakha

khurshid-o-qamar pyare rahte hain chhupe koi

rukhsaron ko go tu ne burqaa se chhupa rakha

chashmak hi nahin tazi shewe ye usi ke hain

jhamki si dikha de kar alam ko laga rakha

lagne ke liye dil ke chhirka tha namak main ne

so chhati ke zakhmon ne kal der maza rakha

kushte ko is abru ke kiya mel ho hasti ki

main taq-e-buland upar jine ko utha rakha

qati hai dalil ai mir is tegh ki be abi

rahm un ne mire haq mein mutlaq na rawa rakha