کیا کیا بیٹھے بگڑ بگڑ تم پر ہم تم سے بنائے گئے

کیا کیا بیٹھے بگڑ بگڑ تم پر ہم تم سے بنائے گئے

چپکے باتیں اٹھائے گئے سر گاڑے وہ ہیں آئے گئے

اٹھے نقاب جہاں سے یا رب جس سے تکلف بیچ میں ہے

جب نکلے اس راہ سے ہو کر منہ تم ہم سے چھپائے گئے

کب کب تم نے سچ نہیں مانیں جھوٹی باتیں غیروں کی

تم ہم کو یوں ہی جلائے گئے وے تم کو وہ ہیں لگائے گئے

صبح وہ آفت اٹھ بیٹھا تھا تم نے نہ دیکھا صد افسوس

کیا کیا فتنے سر جوڑے پلکوں کے سائے سائے گئے

اللہ رے یہ دیدہ درائی ہوں نہ مکدر کیونکے ہم

آنکھیں ہم سے ملائے گئے پھر خاک میں ہم کو ملائے گئے

آگ میں غم کی ہو کے گدازاں جسم ہوا سب پانی سا

یعنی بن ان شعلہ رخوں کے خوب ہی ہم بھی تائے گئے

ٹکڑے ٹکڑے کرنے کی بھی حد ایک آخر ہوتی ہے

کشتے اس کی تیغ ستم کے گور تئیں کب لائے گئے

خضر جو مل جاتا ہے گاہے آپ کو بھولا خوب نہیں

کھوئے گئے اس راہ کے ورنہ کاہے کو پھر پائے گئے

مرنے سے کیا میرؔ جی صاحب ہم کو ہوش تھے کیا کریے

جی سے ہاتھ اٹھائے گئے پر اس سے دل نہ اٹھائے گئے

kya kya baithe bigar bigar tum par ham tum se banae gae

chupke baten uthae gae sar gare wo hain ae gae

uthe naqab jahan se ya rab jis se takalluf bich mein hai

jab nikle is rah se ho kar munh tum ham se chhupae gae

kab kab tum ne sach nahin manen jhuti baten ghairon ki

tum ham ko yun hi jalae gae we tum ko wo hain lagae gae

subh wo afat uth baitha tha tum ne na dekha sad afsos

kya kya fitne sar jore palkon ke sae sae gae

allah re ye dida darai hun na mukaddar kyunke ham

ankhen ham se milae gae phir khak mein ham ko milae gae

ag mein gham ki ho ke gudazan jism hua sab pani sa

yaani ban un shola rukhon ke khub hi ham bhi tae gae

tukre tukre karne ki bhi had ek akhir hoti hai

kushte us ki tegh-e-sitam ke gor tain kab lae gae

khizr jo mil jata hai gahe ap ko bhula khub nahin

khoe gae is rah ke warna kahe ko phir pae gae

marne se kya mir ji sahab ham ko hosh the kya kariye

ji se hath uthae gae par us se dil na uthae gae