کیا کہیے کیا رکھیں ہیں ہم تجھ سے یار خواہش

کیا کہیے کیا رکھیں ہیں ہم تجھ سے یار خواہش

یک جان و صد تمنا، یک دل ہزار خواہش

لے ہاتھ میں قفس ٹک صیاد چل چمن تک

مدت سے ہے ہمیں بھی سیر بہار خواہش

نے کچھ گنہ ہے دل کا نے جرم چشم اس میں

رکھتی ہے ہم کو اتنا بے اختیار خواہش

حالانکہ عمر ساری مایوس گزری تس پر

کیا کیا رکھیں ہیں اس کے امیدوار خواہش

غیرت سے دوستی کی کس کس سے ہو جے دشمن

رکھتا ہے یاری ہی کی سارا دیار خواہش

ہم مہر و رز کیوں کر خالی ہوں آرزو سے

شیوہ یہی تمنا فن و شعار خواہش

اٹھتی ہے موج ہر یک آغوش ہی کی صورت

دریا کو ہے یہ کس کا بوس و کنار خواہش

صد رنگ جلوہ گر ہے ہر جادہ غیرت گل

عاشق کی ایک پاوے کیوں کر قرار خواہش

یک بار بر نہ آئے اس سے امید دل کی

اظہار کرتے کب تک یوں بار بار خواہش

کرتے ہیں سب تمنا پر میرؔ جی نہ اتنی

رکھے گی مار تم کو پایان کار خواہش

kya kahiye kya rakhen hain ham tujh se yar khwahish

yak jan-o-sad tamanna, yak dil hazar khwahish

le hath mein qafas tuk sayyad chal chaman tak

muddat se hai hamen bhi sair-e-bahar khwahish

ne kuchh gunah hai dil ka ne jurm-e-chashm is mein

rakhti hai ham ko itna be ikhtiyar khwahish

halanke umr sari mayus guzri tis par

kya kya rakhen hain us ke umidwar khwahish

ghairat se dosti ki kis kis se ho jai dushman

rakhta hai yari hi ki sara dayar-e-khwahish

ham mehr-o-raz kyun kar khali hun arzu se

shewa yahi tamanna fan-o-shiar khwahish

uthti hai mauj har yak aghosh hi ki surat

dariya ko hai ye kis ka bos-o-kanar-e-khwahish

sad rang jalwa gar hai har jada ghairat-e-gul

ashiq ki ek pawe kyun kar qarar khwahish

yak bar bar na ae us se ummid-e-dil ki

izhar karte kab tak yun bar bar khwahish

karte hain sab tamanna par mir ji na itni

rakhegi mar tum ko payan-e-kar khwahish