کیا کیا مزے سے رات کی عہد شباب میں

کیا کیا مزے سے رات کی عہد شباب میں

چھوڑوں نہ عمر رفتہ گر آ جائے خواب میں

اک دل کے واسطے یہ پھنسے وہ عذاب میں

رہتے ہیں اپنی زلف ہی کے پیچ و تاب میں

ہے شوق وصل تجھ سے لپٹتا ہوں بار بار

ورنہ یہ مستیاں تو نہیں تھیں شراب میں

اتنی نہ کیجے جانے کی جلدی شب وصال

دیکھے ہیں میں نے کام بگڑتے شتاب میں

ہو جائے چاک سینہ کہ دل گھٹ کے مر چلا

اے چارہ جو کسی کو پھنسا مت عذاب میں

کر بحر و بر کی ہستئ موہوم پر نظر

تھوڑی سی خاک ڈال دی چشم پر آب میں

تب قتل گہہ میں قتل عدو کو چلے ہیں وہ

میرا لہو ملا کے پیا جب شراب میں

کن محنتوں سے وصل پہ راضی ہوئے ہیں وہ

سو نامہ بر ہوئے جو سوال و جواب میں

اختر شماریوں میں نکلتا ہے دم کہیں

تسکیںؔ تمہیں کو دخل نہیں ہے حساب میں

kya kya maze se rat ki ahd-e-shabab mein

chhorun na umr-e-rafta gar a jae khwab mein

ik dil ke waste ye phanse wo azab mein

rahte hain apni zulf hi ke pech-o-tab mein

hai shauq-e-wasl tujh se lipatta hun bar bar

warna ye mastiyan to nahin thin sharab mein

itni na kije jane ki jaldi shab-e-wisal

dekhe hain main ne kam bigarte shitab mein

ho jae chak-e-sina ke dil ghut ke mar chala

ai chara jo kisi ko phansa mat azab mein

kar bahr-o-bar ki hasti-e-mauhum par nazar

thori si khak dal di chashm par ab mein

tab qatl gah mein qatl-e-adu ko chale hain wo

mera lahu mila ke piya jab sharab mein

kin mehnaton se wasl pe razi hue hain wo

so nama bar hue jo sawal-o-jawab mein

akhtar shumariyon mein nikalta hai dam kahin

taskin tumhen ko dakhl nahin hai hisab mein