کیا کیا نہ تیرے صدمے سے باد خزاں گرا

کیا کیا نہ تیرے صدمے سے باد خزاں گرا

گل برگ سرو فاختہ کا آشیاں گرا

لکھنے لگی قضا جو ہماری فتادگی

سو بار ہاتھ سے قلم دو زباں گرا

جب پہنچے ہم کنارۂ مقصود کے قریب

تب ناخدا جہاں سے اٹھا بادباں گرا

موباف سرخ چوٹی سے کیا ان کی کھل پڑا

ایک صاعقہ سا دل پہ مرے ناگہاں گرا

تا آسماں پہنچ کے ہوئی آہ سرنگوں

یا رب ہو خیر فوج الم کا نشاں گرا

اٹھ کر چلا جو پاس سے ان کے تو گھر تلک

ہر ہر قدم پہ ضعف سے میں ناتواں گرا

دیکھا جو دشت نجد میں حال تباہ قیس

محمل سے لیلیٰ کود پڑی سارباں گرا

دوزخ پہ کیوں نہ ہو دل بیمارؔ طعنہ زن

آتش سے عشق کی ہے پتنگا یہاں گرا

kya kya na tere sadme se bad-e-khizan gira

gul barg-e-sarw fakhta ka ashiyan gira

likhne lagi qaza jo hamari fatadagi

sau bar hath se qalam do zaban gira

jab pahunche ham kinara-e-maqsud ke qarib

tab nakhuda jahan se utha badban gira

mubaf surkh choti se kya un ki khul para

ek saiqa sa dil pe mire nagahan gira

ta asman pahunch ke hui ah sarnigun

ya rab ho khair fauj alam ka nishan gira

uth kar chala jo pas se un ke to ghar talak

har har qadam pe zof se main natawan gira

dekha jo dasht-e-najd mein hal-e-tabah qais

mahmil se laila kud pari sarban gira

dozakh pe kyun na ho dil-e-bimar taana zan

atish se ishq ki hai patanga yahan gira