کیا کہوں تجھ سے مری جان میں شب کا احوال

کیا کہوں تجھ سے مری جان میں شب کا احوال

تجھ پہ روشن ہے دل وصل طلب کا احوال

ہوں میں اک عاشق بے باک و خراباتی و رند

مجھ سے مت پوچھ مرے علم و ادب کا احوال

دل کو خالی کروں رو رو کے مگر میں بے کس

کون سنتا ہے مرے رنج و تعب کا احوال

محرم راز نہیں ملتا کوئی درد ہے یہ

کیا طبیبوں سے کہوں عشق کے تب کا احوال

لطف ہے سب سے سزاوار غضب ایک ہوں میں

خوب دیکھا جو ترے لطف و غضب کا احوال

اے میاں آج تو دو بات مری بھی سن لے

کہا چاہوں ہوں میں تجھ سے بھلا کب کا احوال

زور ہے جیسے کہ نسبت نمک و ریش کے بیچ

میں ہی سمجھوں تری کیفیت لب کا احوال

نہیں دم مارنے کی مجھ کو ترے آگے مجال

ہائے سنتا ہے تو کس طرح سے سب کا احوال

کیا کوئی خوش ہو مرے شعر کو سن کے حسرتؔ

درد دل ہے یہ نہیں عیش و طرب کا احوال

kya kahun tujh se miri jan mein shab ka ahwal

tujh pe raushan hai dil-e-wasl talab ka ahwal

hun main ik ashiq-e-be bak-o-kharabati-o-rind

mujh se mat puchh mire ilm-o-adab ka ahwal

dil ko khali karun ro ro ke magar main be kis

kaun sunta hai mire ranj-o-taab ka ahwal

mahram-e-raz nahin milta koi dard hai ye

kya tabibon se kahun ishq ke tab ka ahwal

lutf hai sab se sazawar ghazab ek hun main

khub dekha jo tire lutf-o-ghazab ka ahwal

ai miyan aj to do bat miri bhi sun le

kaha chahun hun main tujh se bhala kab ka ahwal

zor hai jaise ke nisbat namak-o-rish ke bich

main hi samjhun tiri kaifiyat-e-lab ka ahwal

nahin dam marne ki mujh ko tire age majal

hae sunta hai to kis tarah se sab ka ahwal

kya koi khush ho mire sher ko sun ke hasrat

dard-e-dil hai ye nahin aish-o-tarab ka ahwal