کیا ہے صندلیں رنگوں نے در بند

کیا ہے صندلیں رنگوں نے در بند

مرا ہو کس طرح سے درد سر بند

نہیں ہیں تیرے دام زلف میں دل

لٹکتے ہیں ہزاروں مرغ پر بند

نہیں بت خانہ و کعبہ پہ موقوف

ہوا ہر ایک پتھر میں شرر بند

رقیبوں سے ہوئی ہے بزم خالی

کرو دروازہ بے خوف و خطر بند

تماشا بند آنکھوں میں ہے مجھ کو

ہوئی میری بظاہر چشم تر بند

نہیں دنیا میں آزادی کسی کو

ہے دن میں شمس اور شب کو قمر بند

دکھاؤ مے کشو اب زور مستی

کیا زاہد نے مے خانے کا در بند

در جاناں بھی اک مرجع ہے بہرامؔ

ہجوم عاشقاں ہے رہ گزر بند

kya hai sandalen rangon ne dar band

mira ho kis tarah se dard-e-sar band

nahin hain tere dam-e-zulf mein dil

latakte hain hazaron murgh par band

nahin but khana-o-kaaba pe mauquf

hawa har ek patthar mein sharar band

raqibon se hui hai bazm-e-khali

karo darwaza be khauf-o-khatar band

tamasha band ankhon mein hai mujh ko

hui meri bazahir chashm-e-tar band

nahin duniya mein azadi kisi ko

hai din mein shams aur shab ko qamar band

dikhao mai kasho ab zor masti

kiya zahid ne mai khane ka dar band

dar janan bhi ik marjaa hai bahram

hujum-e-ashiqan hai rah guzar band