کیا کیا نہ رنگ تیرے طلب گار لا چکے

کیا کیا نہ رنگ تیرے طلب گار لا چکے

مستوں کو جوش صوفیوں کو حال آ چکے

ہستی کو مثل نقش کف پا مٹا چکے

عاشق نقاب شاہد مقصود اٹھا چکے

کعبے سے دیر دیر سے کعبے کو جا چکے

کیا کیا نہ اس دوراہے میں ہم پھیر کھا چکے

گستاخ ہاتھ طوق کمر یار کے ہوئے

حد ادب سے پاؤں کو آگے بڑھا چکے

کنعاں سے شہر مصر میں یوسف کو لے گئے

بازار میں بھی حسن کو آخر دکھا چکے

پہنچے تڑپ تڑپ کے بھی جلاد تک نہ ہم

طاقت سے ہاتھ پاؤں زیادہ ہلا چکے

ہوتی ہے تن میں روح پیام اجل سے شاد

دن وعدۂ وصال کے نزدیک آ چکے

پیمانہ میری عمر کا لبریز ہو کہیں

ساقی مجھے بھی اب تو پیالہ پلا چکے

جامے کو جسم کے بھی جو پرزے اڑا چکے

بے وجہ ہر دم آئنہ پیش نظر نہیں

سمجھے ہم آپ آنکھوں میں اپنی سما چکے

اس دل ربا سے وصل ہوا دے کے جان کو

یوسف کو مول لے چکے قیمت چکا چکے

اٹھا نقاب چہرۂ زیبائے یار سے

دیوار درمیاں جو تھی ہم اس کو ڈھا چکے

زیر زمیں بھی تڑپیں گے اے آسمان حسن

بیتاب تیرے گور میں بھی چین پا چکے

آرائش جمال بلا کا نزول ہے

اندھیر کر دیا جو وہ مسی لگا چکے

دو ابرو اور دو لب جاں بخش یار کے

زندوں کو قتل کر چکے مردے جلا چکے

مجبور کر دیا ہے محبت نے یار کی

باہر ہم اختیار سے ہیں اپنے جا چکے

صدموں نے عشق حسن کے دم کر دیا فنا

آتشؔ سزا گناہ محبت کی پا چکے

kya kya na rang tere talab gar la chuke

maston ko josh-e-sufiyon ko hal a chuke

hasti ko misl-e-naqsh-e-kaf-e-pa mita chuke

ashiq naqab-e-shahid-e-maqsud utha chuke

kaabe se der der se kaabe ko ja chuke

kya kya na is dorahe mein ham pher kha chuke

gustakh hath tauq kamar yar ke hue

had-e-adab se paon ko age barha chuke

kanan se shahr-e-misr mein yusuf ko le gae

bazar mein bhi husn ko akhir dikha chuke

pahunche tarap tarap ke bhi jallad tak na ham

taqat se hath paon ziyada hila chuke

hoti hai tan mein ruh payam-e-ajal se shad

din waada-e-wisal ke nazdik a chuke

paimana meri umr ka labrez ho kahin

saqi mujhe bhi ab to pyala pila chuke

jame ko jism ke bhi jo purze ura chuke

be wajh har dam aina pesh-e-nazar nahin

samjhe ham ap ankhon main apni sama chuke

is dil ruba se wasl hua de ke jan ko

yusuf ko mol le chuke qimat chuka chuke

utha naqab-e-chehra-e-zeba-e-yar se

diwar darmiyan jo thi ham us ko dha chuke

zer-e-zamin bhi tarpenge ai asman-e-husn

betab tere gor mein bhi chain pa chuke

araish-e-jamal-e-bala ka nuzul hai

andher kar diya jo wo missi laga chuke

do abru aur do lab-e-jan bakhsh yar ke

zindon ko qatl kar chuke murde jala chuke

majbur kar diya hai mohabbat ne yar ki

bahar ham ikhtiyar se hain apne ja chuke

sadmon ne ishq-e-husn ke dam kar diya fana

atish saza gunah mohabbat ki pa chuke