کیا کہوں کیسا ستم غفلت سے مجھ پر ہو گیا

کیا کہوں کیسا ستم غفلت سے مجھ پر ہو گیا

قافلہ جاتا رہا میں صبح ہوتے سو گیا

بے کسی مدت تلک برسا کی اپنی گور پر

جو ہماری خاک پر سے ہو کے گزرا رو گیا

کچھ خطرناکی طریق عشق میں پنہاں نہیں

کھپ گیا وہ راہرو اس راہ ہو کر جو گیا

مدعا جو ہے سو وہ پایا نہیں جاتا کہیں

ایک عالم جستجو میں جی کو اپنے کھو گیا

میرؔ ہر یک موج میں ہے زلف ہی کا سا دماغ

جب سے وہ دریا پہ آ کر بال اپنے دھو گیا

kya kahun kaisa sitam ghaflat se mujh par ho gaya

qafila jata raha main subh hote so gaya

be kisi muddat talak barsa ki apni gor par

jo hamari khak par se ho ke guzra ro gaya

kuchh khatarnaki tariq-e-ishq mein pinhan nahin

khap gaya wo rahrau is rah ho kar jo gaya

muddaa jo hai so wo paya nahin jata kahin

ek alam justuju mein ji ko apne kho gaya

mir har yak mauj mein hai zulf hi ka sa dimagh

jab se wo dariya pe a kar bal apne dho gaya