کیا لیے جاتے ہو چپکے سے چھپا کر ہاتھ میں

کیا لیے جاتے ہو چپکے سے چھپا کر ہاتھ میں

دل نہیں ہے گر تو کیا ہے بندہ پرور ہاتھ میں

تل ہتھیلی کا ہے دانہ اور لکیریں دام ہیں

طائر رنگ حنا آتا ہے اڑ کر ہاتھ میں

جذبۂ دل نے جو گھبرایا پہن کر چل دئے

ہاتھ کا پاؤں میں اور پاؤں کا زیور ہاتھ میں

لے اڑا کیا اضطراب جستجوئے نامہ بر

میں جو اچھلا آ گئے جبریل کے پر ہاتھ میں

ہوں وہ دیوانہ ترا صحرا میں جس کی دھوم تھی

دیکھ کر مجنوں اٹھا لیتا تھا پتھر ہاتھ میں

کل کسی کا خون ہوگا شہر میں مشہور ہے

شعلہؔ مہندی لگ رہی ہے آج گھر گھر ہاتھ میں

kya liye jate ho chupke se chhupa kar hath mein

dil nahin hai gar to kya hai banda parwar hath mein

til hatheli ka hai dana aur lakiren dam hain

tair-e-rang-e-hina ata hai ur kar hath mein

jazba-e-dil ne jo ghabraya pahan kar chal diye

hath ka paon mein aur paon ka zewar hath mein

le ura kya iztirab-e-justuju-e-nama bar

main jo uchhla a gae jibril ke par hath mein

hun wo diwana tira sahra mein jis ki dhum thi

dekh kar majnun utha leta tha patthar hath mein

kal kisi ka khun hoga shahr mein mashhur hai

shola mehndi lag rahi hai aj ghar ghar hath mein