ترے آگے عدو کو نامہ بر مارا تو کیا مارا

ترے آگے عدو کو نامہ بر مارا تو کیا مارا

نہ مارا جاں سے جس دم اس کو گر مارا تو کیا مارا

اگر دل مارتے اپنا تو کیوں یہ ذلتیں پاتے

تری خواہش میں ظالم ہم نے سر مارا تو کیا مارا

وہ ماریں قہقہہ سن کر مری سینہ زنی کا حال

ادھر مارا تو کیا مارا ادھر مارا تو کیا مارا

تمہارے ہاتھ تو لے لیتا اپنے ہاتھ سے ہیہات

دوپٹے سے جو پہونچے باندھ کر مارا تو کیا مارا

نہ دیکھو دور سے ہی مجھ کو ان ٹیڑھی نگاہوں سے

کسی کو تیر تم نے پھینک کر مارا تو کیا مارا

صبا یہ کب جلن ہوتی جو شام ہجر گل ہوتی

طپانچہ شمع کو وقت سحر مارا تو کیا مارا

ہوا ہے میری رسوائی سے تیرے حسن کا شہرہ

جو مجھ کو جاں سے اے بیداد گر مارا تو کیا مارا

تری دوری میں بے تاثیر گر روئے تو کیا روئے

تری فرقت میں نعرہ بے اثر مارا تو کیا مارا

کہیں ہوتا ہے دل کا جوش سودا کم عبث رگ زن

رگوں میں میری تو نے نیشتر مارا تو کیا مارا

نظامؔ اس نفس امارہ کی گردن بھی کبھی توڑی

جواں مردی کا دم تم نے اگر مارا تو کیا مارا

tire age adu ko nama bar mara to kya mara

na mara jan se jis dam us ko gar mara to kya mara

agar dil marte apna to kyun ye zillaten pate

tiri khwahish mein zalim ham ne sar mara to kya mara

wo maren qahqaha sun kar miri sina zani ka hal

idhar mara to kya mara idhar mara to kya mara

tumhare hath to le leta apne hath se hehat

dupatte se jo pahunche bandh kar mara to kya mara

na dekho dur se hi mujh ko un terhi nigahon se

kisi ko tir tum ne phenk kar mara to kya mara

saba ye kab jalan hoti jo sham-e-hijr gul hoti

tapancha shama ko waqt-e-sahar mara to kya mara

hua hai meri ruswai se tere husn ka shohra

jo mujh ko jan se ai bedad gar mara to kya mara

tiri duri mein be tasir gar roe to kya roe

tiri furqat mein naara be asar mara to kya mara

kahin hota hai dil ka josh-e-sauda kam abas rag zan

ragon mein meri tu ne neshtar mara to kya mara

nizam is nafas ammara ki gardan bhi kabhi tori

jawan mardi ka dam tum ne agar mara to kya mara