کیا کریں جا کے گلستاں میں ہم

کیا کریں جا کے گلستاں میں ہم

ہیں بہ کنج قفس فغاں میں ہم

جانتے آپ سے جدا تجھ کو

کرتے گر فرق جسم و جاں میں ہم

ہیں تجلیٔ ذات کے تیری

ایک پردہ سا درمیاں میں ہم

گل کا یہ رنگ ہے تو اب اک دن

آگ رکھ دیں گے آشیاں میں ہم

واں تغافل نے اپنا کام کیا

یاں رہے مہر کے گماں میں ہم

آسماں کو نشانہ کرتے ہیں

تیر رکھتے ہیں جب کماں میں ہم

مر کے نکلے قفس سے خوب ہوا

تنگ آئے تھے اس مکاں میں ہم

گر یہی آہ ہے تو دیکھو گے

رخنے کر دیں گے آسماں میں ہم

شاخ گل کے گلے سے لگ لگ کر

روتے ہیں موسم خزاں میں ہم

باغ تک جاتے ہاں اگر پاتے

طاقت اس جسم ناتواں میں ہم

مصحفیؔ عشق کر کے آخر کار

خوب رسوا ہوئے جہاں میں ہم

kya karen ja ke gulsitan mein ham

hain ba kunj-e-qafas fughan mein ham

jante ap se juda tujh ko

karte gar farq jism-o-jan mein ham

hain tajalli-e-zat ke teri

ek parda sa darmiyan mein ham

gul ka ye rang hai to ab ik din

ag rakh denge ashiyan mein ham

wan taghaful ne apna kam kiya

yan rahe mehr ke guman mein ham

asman ko nishana karte hain

tir rakhte hain jab kaman mein ham

mar ke nikle qafas se khub hua

tang ae the is makan mein ham

gar yahi ah hai to dekhoge

rakhne kar denge asman mein ham

shakh-e-gul ke gale se lag lag kar

rote hain mausam-e-khizan mein ham

bagh tak jate han agar pate

taqat is jism-e-natawan mein ham

mushafi ishq kar ke akhir kar

khub ruswa hue jahan mein ham