کیا ملا تم کو مرے عشق کا چرچا کر کے

کیا ملا تم کو مرے عشق کا چرچا کر کے

تم بھی رسوا ہوئے آخر مجھے رسوا کر کے

مجھ پہ تلوار کا احساں نہ ہوا خوب ہوا

مار ڈالا تری آنکھوں نے اشارا کر کے

نگہ شوق کو مانع نہیں پردہ کوئی

آپ جائیں گے کہاں آنکھ سے پردا کر کے

تم نے کی وعدہ خلافی تو کوئی بات نہیں

سبھی معشوق مکر جاتے ہیں وعدا کر کے

ہر مرض کے لیے خالق نے دوا پیدا کی

مجھ کو بیمار کیا تجھ کو مسیحا کر کے

اڑ گیا رنگ جو مہندی کا تو کیا غم ان کو

پھر جما لیں گے ابھی خون تمنا کر کے

شکر اس بندہ نوازی کا ادا کیا ہو جلیلؔ

مرے سرکار نے رکھا مجھے اپنا کر کے

kya mila tum ko mire ishq ka charcha kar ke

tum bhi ruswa hue akhir mujhe ruswa kar ke

mujh pe talwar ka ehsan na hua khub hua

mar dala tiri ankhon ne ishara kar ke

nigah-e-shauq ko mane nahin parda koi

ap jaenge kahan ankh se parda kar ke

tum ne ki waada khilafi to koi bat nahin

sabhi maashuq makar jate hain waada kar ke

har maraz ke liye khaliq ne dawa paida ki

mujh ko bimar kiya tujh ko masiha kar ke

ur gaya rang jo mehndi ka to kya gham un ko

phir jama lenge abhi khun-e-tamanna kar ke

shukr is banda nawazi ka ada kya ho jalil

mire sarkar ne rakha mujhe apna kar ke